पोखरा।
पोखरा हार्डवयर एशोसिएसन कास्कीको अध्यक्षमा अर्जुन बहादुर थापा चयन भएका छन् । एशोसिएसनको शनिवार सम्पन्न ३१ औँ साधारणसभा तथा १६ औँ अधिवेशनले थापाको अध्यक्षतामा सर्वसम्मत नयाँ कार्यसमिति चयन गरेको हो ।
समितिको उपाध्यक्षमा अमर बहादुर के.सी रचन्द्र प्रसाद अधिकारी चयन भएका छन् । एशोसिएसनको महासचिवमा प्रताप राज पौडेल, सचिवमा रामेश्वर आचार्य, कोषाध्यक्षमा मनोज कुमार अधिकारी चयन भएका छन् । सदस्यहरुमा बल बहादुर कुवर, सुलोष कुवर, दिपक पौडेल, विनोद के.सी., हेमराज लम्साल चुनिएका छन् । शिवराज बास्तोला र महादेव गिरीलाई मनोनित सदस्यका रुपमा चयन गरिएको छ ।
यसअघि ३१ औँ साधारणसभाको अवसरमा आयोजित कार्यक्रममा पोखरा उद्योग वाणिज्य संघका अध्यक्ष गोकर्ण कार्कीले हार्डवयरसहितका व्यवसाय सञ्चालनमा व्यवसायीहरुमा परेका समस्या समाधान गर्न निर्वाचित भएर आएदेखि नै निरन्तर खटिरहेको बताए । उनले पोखरा उद्योग वाणिज्य संघको निर्वाचनपश्चात भएको पहिलो बैठकमा नै व्यवसायीहरुको समस्या पहिचान गर्न सबै वस्तुगत संघसंस्थाका अध्यक्षहरुसँग बसेर छलफल गरेको र निष्कर्षपश्चात देखिएको समस्याहरु समाधानका लागी १० भन्दा बढि सरोकारवाला निकायहरुलाई लिखित र मौखिक रुपमा संवाद गरिरहेको जानकारी दिए ।
पोखरा महानगरपालिका वडा नं. ९ का वडाअध्यक्ष दिपेन्द्र मर्सानीले पोखरामा कोशेली घर निर्माण गर्ने परिकल्पना सार्वजनिक गरेको बताउँदै यसमा हार्डवयर व्यवसायीहरुको साथको अपेक्षा रहेको सुनाए । करिब २ अर्वको बजेटमा बन्ने कोशेली घरले पोखराबाट उत्पादन हुने कुनैपनि वस्तुको प्रवर्दनमा सहयोग पुग्ने विश्वास व्यक्त गरे ।
पोखरा हार्डवयर एशोसिएसन कास्कीका अध्यक्ष पृथ्वीराज तिमिल्सीनाले व्यवसायमा अहिलेजस्तो मन्दी यसअघि कहिल्यैपनि नआएको बताउँदै विचलित नहुन आग्रह गरे । उनले हाल चलिरहेको मन्दिबाट छुटकारा पाईनेतर्फ आशाबादी हुन आग्रह गर्दै व्यवसायबाट हात नझिकिहाल्न व्यवसायीलाई अनुरोध गरे ।
कार्यक्रममा लेखनाथ उद्योग वाणिज्य संघका वरिष्ठ उपाध्यक्ष राजेन्द्र ओझा लगायत उद्योगी व्यवसायीहरुको उपस्थिति रहेको थियो । कार्यक्रमको सञ्चालन भने पोखरा हार्डवयर व्यवसायी एशोसिएसनका महासचिव कृष्ण कोईरालाले गरेका थिए ।
