शुक्रवार र बिहीवार पाकिस्तानबाट ८ सय भन्दा बढी अफगान शरणार्थी स्वदेश फर्किएका छन् । अफगानिस्तानको शरणार्थी तथा स्वदेश फिर्ता मामिला मन्त्रालयले यसबारेमा जानकारी दिएको हो । कुल ८३७ शरणार्थीहरू पाकिस्तानबाट तोर्खाम र स्पिन बोल्दाक सीमा नाका हुँदै अफगानिस्तान फर्किएका छन् । पाकिस्तान सरकारले अप्रिल १५ बाट अफगान आप्रवासीहरूलाई फिर्ता पठाउने दोस्रो चरण शुरु गरेको र पहिलो चरणमा ५ लाख ५० हजार भन्दा बढी अफगान शरणार्थीहरू पाकिस्तानबाट फर्किएका अफगान अधिकारीहरूले बताएका छन् । अफगान कार्यवाहक सरकारले विदेशमा रहेका अफगानी आप्रवासीहरूलाई स्वदेश फर्कन र युद्धग्रस्त देशको पुनर्निर्माणमा योगदान दिन बारम्बार आग्रह गरेको छ ।
