पोखरा । कास्कीमा धारिलो हतियार देखाई सुनका गहना र पैसा चोरी गर्ने ४ जना पक्राउ परेका छन् ।
पक्राउ पर्नेमा कास्की माछापुच्छ्रे गाउँपालिका वडा नं. ४ लाहाचोक बस्ने वर्ष ४२ को सुर्य बहादुर घर्ती क्षेत्री, वडा नं. २ भराभरी बस्ने वर्ष ५१ को खड्क बहादुर पुन मगर, पोखरा महानगरपालिका वडा नं. २१ बस्ने वर्ष ५८ को लोक बहादुर राना मगर, वडा नं. ३ नदिपुर बस्ने वर्ष ३५ को राजु सुनार रहेका छन् ।
प्रहरीका अनुसार यही साउन ३ गते राति साढे ८ बजे कास्की माछापुच्छ्रे गाउँपालिका १ रुम्जा बस्ने शशीधर काफ्लेको घरमा उनीहरुले धारिलो हतियार देखाई विभिन्न किसिमका सुनका गरगहना र पैसा धनमाल चोरी गरेका थिए ।
प्रहरीले उनीहरुको साथबाट चोरी भएका (सिक्री १ थान, तिलहरी १ थान, औंठी ३ थान, रिङ ३ जोर), मोवाईल १ थान र नगद रु.१ लाख ७३ हजारसमेत गरी अन्दाजी मूल्य रु. १४ लाख ८ हजार बराबरका धनमाल बरामद गरेको छ ।
पक्राउ परेका उनीहरुलाई चोरी तथा डाँका सम्बन्धी मुद्दामा कास्की जिल्ला अदालतबाट ५ दिन म्याद थप गरी आवश्यक अनुसन्धान प्रकृया अगाडी बढाईएको प्रहरीले जनाएको छ ।
