नेपाली काँग्रेसका राष्ट्रिय सभा सदस्य कृष्णबहादुर रोकायले नेपाली काँग्रेस र नेकपा एमाले मिल्दा नआत्तिन साना दलहरुसँग आग्रह गर्नुभएको छ ।
सोमवारको राष्ट्रिय सभाको बैठकमा बोल्दै उहाँले यस्तो आग्रह गर्नुभएको हो । उहाँले दुई राजनीतिक ठूला दलहरु मिल्दा विगतमा पनि देश र जनताका लागि हित भएको बताउनु भयो । उहाँले निर्वाचन प्रणालीमा संशोधन गर्न आवश्यक रहेको बताउनु भयो । उहाँले दुई दल मिल्दा कसैले पनि नकारात्मक टिप्पणी गर्न आवश्यक नरहेको बताउनु भयो ।
उहाँले भन्नुभयो, ‘दुई दल मिल्दा कसैले यसलाई नकारात्मक टिप्पणी गर्नुपर्ने, कसैले यसबाट दुई ठूला दल मिलेको कुरामा आत्तिनुपर्ने देख्दिन । त्यसकारण हाम्रो निर्वाचन प्रणाली आज जुन खालको स्थिरता छैन, राजनीतिक स्थिरता छैन, यसको निम्ति निर्वाचन प्रणाली बदल्नुपर्छ । ठूला दलहरु मिल्दा मुलुकलाई फाइदा नै भएको छ । हामी जति बेला ठूला दलहरु मिलेर गएका छौँ, जति बेला राष्ट्रिय सहमतिले अघि बढेका छौँ, त्यतिबेला मुलुकले फाइदा नै लिएको छ । नेपाली जनतालाई फाइदा नै भएको छ ।’
सांसद रोकायले ठूला राजनीतिक दलहरुबीच एक आपसमा सौहाद्रपूर्ण सम्बन्ध हुनुपर्ने बताउनु भयो ।
