प्रधानमन्त्री केपी शर्मा ओलीले सरकारलाई नधम्क्याउन नेकपा (माओवादी केन्द्र) का अध्यक्ष पुष्पकमल दाहाललाई आग्रह गर्नुभएको छ ।
आईतवार काठमाडौंमा गैर आवासीय नेपाली संघको कार्यक्रमलाई सम्बोधन गर्ने क्रममा नागरिकलाई धम्क्याएर पुनः सत्ता प्राप्ति गर्छु भन्ने नठान्न चेतावनी दिनुभएको हो । अध्यक्ष दाहाललक्षित टिप्पणी गर्दै उहाँले शनिवार काठमाडौंमा माओवादी केन्द्रले गरेको खबरदारी सभामा दाहालले आफूहरुले हतियार चलाउन नबिर्सिएको र बिसाएको मात्रै भन्ने शब्दहरु प्रयोग गर्दै भाषण गरेको भन्दै हतियार कसरी बिसाउन लगाउने भन्नेकुराको राम्रो ज्ञान आफूलाई रहेको बताउनु भयो । उहँँले धम्क्याएर खान पाउने भ्रम अब नपाल्न आग्रह गर्नुभयो ।
उहाँले भन्नुभयो, ‘हिजो एक जन उफ्रिउफ्रिकन भाषण गर्दै थिए । हिजो मात्रै हो । हतियार बिसाएको मात्रै हो । भ्रम नरहोस् । चलाउन बिर्सिएको छैन । त्यस्तै त्यस्तै त हामी हुनु भएन नि । धम्क्याएका भरमा खाने, म त्यसलाई फेरि हतियार कसरी बिसाउन लगाउनुपर्छ तरिका थाहा छ पनि नभनौँ । हामी चलाउन त चलाउँदैनौँ तर बिसाउन लगाउन जानेको छ हामीले । कसरी बिसाउने भनेर ।’
प्रधानमन्त्री ओलीले एनआरएनएमा कुनै राजनीतिक दल र सरकारको हस्तक्षेप नहुने बताउनु भयो । उहाँले ढुक्क भएर आफ्ना कार्यक्रमहरु स्वतन्त्र रुपमा गर्न आग्रहसमेत गर्नुभयो । उहाँले आफू एमालेको प्रधानमन्त्री नभइ देशको प्रधानमन्त्री भएकाले प्रधानमन्त्रीको रुपमा कसैप्रति पनि भेदभाव गर्न नहुने बताउनु भयो ।
उहाँले भन्नुभयो, ‘पोल्टिकल पार्टीहरुका आफ्नै संगठनहरु होलान्, त्यसले आफ्ना काम आफैँ गर्लान्, यस संगठनभित्र राजनीतिक वार नगरौँ । सरकारको तर्फबाट तपाईंहरुलाई कुनै हस्तक्षेप हुनेछैन । तपाईंहरुल स्वतन्त्र भएर काम गर्नुस् । म देशको प्रधानमन्त्री हो, एमालेको प्रधानमन्त्री होइन । मैले कसैप्रति भेदभाव गर्न मिल्दैन, गर्दिन, प्रधानमन्त्रीको हैसियतले । मान्छेका त आफ्ना आफ्ना हैसियत हुन्छन् नि । हामी कुनै हस्तक्षेप गर्दैनौँ । सकेको सहयोग पु¥याउँछौँ । तपाईंहरु एकतावद्ध भएर चल्नका लागि के गर्नुपर्छ, गर्नुस् ।’
प्रधानमन्त्री ओलीले सबै एनआरएनएहरु एकतावद्ध भएर देश विकासमा लाग्न आग्रह गर्नुभयो ।
