ललितपुर महानगरपालिकाले संस्कृति शिरोमणि एवं अनुसन्धानकर्ता हरिराम जोशी र संस्कृतिविद्, अन्वेषक तथा वरिष्ठ साहित्यकार छत्रबहादुर कायस्थलाई आजीवन सवारीसाधन, सुरक्षाकर्मी र सञ्चारसाधनको व्यवस्था गर्ने भएको छ ।
.
बिहीवार ललिपुरमा एक कार्यक्रमको आयोजना गरी महानगरपालिकाले आजबाट लागू हुनेगरी अनुसन्धानकर्ता जोशी र वरिष्ठ साहित्यकार कायस्थलाई आजीवन सवारीसाधन, सुरक्षाकर्मी र सञ्चारसाधनको व्यवस्था गरेको हो । कार्यक्रममा बोल्दै ललितपुर महानगरपालिकाका प्रमुख चिरिबाबु महर्जनले कला, संस्कृति, सम्पदा संरक्षणमा अनवरत रुपमा सक्रिय भइ महानगरको पहिचान बढाउने काम गरेको योगदानको कदरस्वरुप उहाँहरुको दिनचर्यालाई सहज बनाउन सो सम्मान दिएको बताउनु भयो । उहाँले अस्पतालमा भर्ना भइ उपचार गराउनुपरेको अवस्थामा लाग्ने सम्पूर्ण खर्च समेत महानगरपालिकाले व्यहोर्ने बताउनु भयो ।
उहाँले भन्नुभयो, ‘हामीले आज वास्तवमा ठूलो काम गरेका छैनौँ । मात्र उहाँहरुको सम्मानमा, उहाँहरु यत्रतत्र जहाँ जहाँ जानुहुन्छ, कृपा गरी तपाईंहरु अब टयाक्सी नचढ्नुस्, बस नचढ्नुस्, मोटरसाइकलको पछाडि पनि नबस्नुस् । महानगरपालिकाले तपाईंहरुको जीवन पर्यन्तको निमित्त हामीले गाडीको व्यवस्थापन गरेका छौँ । तपाईंहरु जहाँ जानको लागि भएपनि गाडीको प्रयोग गर्नुहोस् । तपाईंहरु दुवै जनाको निमित्त एउटा गाडीको व्यवस्थापन गरेका छौँ । त्यसमा ड्राइभर, सेक्युरिटी गार्ड र मोबाइल दिएका छौँ । हामी तपाईंहरुको कन्ट्याक्टमा बसिरहन्छौँ, हामीले एउटा फुल टाइमर ड्राइभरको पनि हामीले व्यवस्थापन गर्छौं । कतै जानुपर्दा खबर गर्नुस्, महानगरपालिका हाजिर हुन्छ । ललितपुर महानगरपालिकाले उहाँहरुलाई हस्पिटलाइज भएर कुनैपनि किसिमको औषधि उपचार गर्नुपर्ने अवस्था छ भने त्यसको सम्पूर्ण खर्च, आर्थिक भार महानगरपालिकाले व्यहोर्छ ।’
संस्कृति शिरोमणि एवं अनुसन्धानकर्ता जोशीका पुस्तकहरु राष्ट्रिय र अन्तर्राष्ट्रिय विश्वविद्यालयको पाठ्यपुस्तकको रुपमा समावेश रहेका छन् । साथै संस्कृतिविद्, अन्वेषक तथा वरिष्ठ साहित्यकार कायस्थको पुस्तक पनि विश्वविद्यालयको पाठ्यपुस्तकको रुपमा समावेश छ । जोशीले संस्कृतिका विविध विधामा तीन दर्जन बढी पुस्तक लेख्नुभएको छ भने कायस्थका ५ दर्जन भन्दा बढी पुस्तक प्रकाशित छन् । कला, संस्कृति, सम्पदा संरक्षणमा योगदान पु¥याउने व्यक्तित्वको सम्मान र कदरस्वरुप महानगरपालिकाले सो काम गरिरहेको प्रमुख महर्जनले बताउनु भयो ।
