पोखरा । नेपाल निर्माण व्यवसायी संघ कास्कीले ३८औँ स्थापना दिवसको अवसर पारेर रक्तदान कार्यक्रम आयोजना गर्यो । कार्यक्रममा ३८ युनिट रगत संकलन भएको छ ।
कार्यक्रम उद्घाटन गर्दै नेपाल निर्माण व्यवसायी महासंघका केन्द्रीय उपाध्यक्ष खीमप्रकाश मल्लले महासंघले व्यवसायीका हक, हित र अधिकारका लागि काम गर्दै आएको बताए ।
उनले पुराना आयोजनामा सरकारले बजेट व्यवस्थापन नगरेकाले त्यस्ता ठेक्का अन्त्य गर्नुपर्दछ भन्ने माग आफूहरुले उठाइरहेको बताए । सरकारले पुराना ठेक्काको साढे छ अर्ब भुक्तानी बाँकी रहेको मल्ले जानकारी दिए ।
संघका अध्यक्ष लिलकाजी गुरुङले संघले व्यवसायीका हक हितसँगै सामाजिक उत्तरदायित्वका धेरै काम गरिरहेको बताए ।
“हामीमा धेरै समस्या छन्, ती समस्या थाँती राखेर सामाजिक कार्य गर्नेछौँ, सोही अनुसार खुला रक्तदान कार्यक्रम गरेका हौँ”, अध्यक्ष गुरुङले भने ।
कार्यक्रममा नेपाल निर्माण व्यवसायी महासंघका पूर्व मानार्थ सदस्य शिवशंकर गौचन, केन्द्रीय सदस्य एवं संघका निर्वतमान अध्यक्ष सुरेश श्रेष्ठ, संघका सल्लाहकारहरु ओमप्रसाद गौचन, ऋषिराम गौतम, गण्डकी प्रदेश निर्माण व्यवसायी संघका अध्यक्ष टंकराज बराललगायतले निर्माण क्षेत्रका समस्या समाधानका व्यवसायिक एकतामा जोड दिए ।
संघका वरिष्ठ उपाध्यक्ष प्रेम पहारीले स्वागत र कार्यक्रम सञ्चालन सचिव डम्बरराज ढकालले गरेका थिए ।
थापना दिवसका अवसरमा निर्माण व्यवसायी कल्याणकारी कोषबाट ७० वर्ष पार गरेका निर्माण व्यवसायीलाई दिइँदै आएको कोषको रकमको ५० प्रतिशत रकम एक लाख ५० हजार रुपैयाँ निर्माण व्यवसायी गणेशराज अधिकारीलाई प्रदान गरिएको थियो । अधिकारीलाई पहिलोपटक औपचारिक रुपमा अधिकारीलाई सो सहयोग प्रदान गरिएको हो ।
व्यवसायी कल्याण कोषबाट मरणोपरान्त सहयोग गर्ने गरिएकामा वर्तमान कार्यसमिति निर्वाचित भएर आएपछि निवेदकले निवेदन दिएपछि औपचारिक कार्यक्रममा सम्मानसहित सो रकम प्रदान गरिँदै आएको संघका सचिव ढकालले जानकारी दिए ।
