पोखरा । राष्ट्रिय स्वतन्त्र पार्टी (रास्वपा) का सभापति एवं पूर्व गृहमन्त्री रवि लामिछाने रिहा भएका छन् । बुधबार जिल्ला अदालत काठमाडौँमा ६० लाख धरौटी बुझाएर उनी रिहा भएका हुन् । लामिछानेले प्रभु बैंकको बैंक ग्यारेन्टी धरौटीको रुपमा बुझाएका थिए । योसँगै लामिछानेले अब हिरासत बाहिर बसेर नै मुद्दाको पुर्पक्ष गर्न पाउने भएका छन् ।
यसअघि लामिछानेलाई जिल्ला अदालत काठमाडौंले ६० लाख रुपैयाँ धरौटीमा छाड्न आदेश दिएको थियो । काठमाडौंस्थित स्वर्णलक्ष्मी बहुउद्देश्यीय सहकारी संस्थाको रकम अपचलन मुद्दाको थुनछेक बहसपछि न्यायाधीश माधवप्रसाद अधिकारीले इजलासले उनलाई ६० लाख रुपैयाँ धरौटी लिएर छाड्न आदेश गरेको हो ।
लामिछाने यसअघि सूर्यदर्शन सहकारी ठगी प्रकरणमा कास्की जिल्ला अदालतमा ६५ लाख धरौटी बुझाएर गत बिहीबार मात्र रिहा भएका थिए । कास्की जिल्ला अदालतको आदेशपछि प्रहरीले काठमाडौं जिल्ला अदालतमा उपस्थित हुने गरी परिवारको जिम्मा लगाएको थियो ।
उनी आइतबार काठमाडौं जिल्ला अदालतमा उपस्थित भएका थिए । त्यसअघि उनी ८४ दिनदेखि प्रहरी हिरासतमा थिए । स्वर्णलक्ष्मी सरकारीको रकम अपचलन गरेको अभियोगमा लामिछानेसहित ३९ जनालाई प्रतिवादी बनाइएको छ ।
यसैबीच राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध अदालतमा बहस गरेकै कारण उनका कार्यकर्ताले वरिष्ठ अधिवक्तामाथि आक्रमण गरेका छन् । काठमाडौँ जिल्ला अदालत बाहिर वरिष्ठ अधिवक्ता दिनेश त्रिपाठीमाथि रास्वपा समर्थकले आक्रमण गरेका हुन् ।
आक्रमणमा संलग्न आरोपमा दोलखा घर भएका ललितकुमार केसीलाई पक्राउ गरिएको जिल्ला प्रहरी परिसर काठमाडौँका एसपी नवराज अधिकारीले बताए ।
वरिष्ठ अधिवक्ता त्रिपाठीले मङ्गलबार र बुधबार काठमाडौँ जिल्ला अदालतका न्यायाधीश माधवप्रसाद अधिकारीको इजलासमा बहस गरेका थिए । बहसमा उनले रवि लामिछाने सहकारीको रकम अपचलनमा संलग्न भएको जिकिर गरेका थिए । बुधवार उनले रवि तर्फका कानुन ब्यवसायीले गरेको बहसको जवाफ दिएका हुन् ।
जवाफी बहस सकेर अदालतबाट बाहिर निस्केपछि रवि समर्थकले उनको झोला तानेर आक्रमण प्रयास गरेका थिए । तर, प्रहरीले उनलाई तत्काल उद्धार गरेको छ । प्रहरी वृत्त सिंहदरबारका डीएसपी गंगा पौडेल नेतृत्वको टिमले आक्रमणकारीलाई नियन्त्रणमा लिएर त्रिपाठीमाथि कुटपिट हुनबाट जोगाएका हुन् ।
पीडितको पक्षमा बहस पैरवी गर्ने कानुन व्यवसायीमाथि आक्रमण गर्ने काम ‘आपराधिक उपद्रव’ भएको अर्का वरिष्ठ अधिवक्ता डा.सुरेन्द्र भण्डारीले बताए ।
