इजिप्टको नयाँ मन्त्रिपरिषद्ले बुधवार इजिप्टको राजधानी कायरोको अल–इतिहादिया दरबारमा इजिप्टका राष्ट्रपति अब्देल–फताह अल–सिसी समक्ष शपथ ग्रहण गरेको छ । नयाँ मन्त्रिपरिषद्को नेतृत्व प्रधानमन्त्री मोस्तफा मदबोलीले गर्नुभएको छ । जो २०१८ देखि पदमा हुनुहुन्छ । ३० मन्त्री सम्मिलित नयाँ सरकारले केही मन्त्रालयहरू गाभ्ने र नयाँ, विशेष गरी आर्थिक विभागहरू समावेश गरेको देखिएको छ । परराष्ट्र, अर्थ, आपूर्ति, पेट्रोलियम, विद्युत र पर्यटनलगायत १७ मन्त्रालयलाई समेटेको छ । अहमद कौचौकलाई अर्थमन्त्री नियुक्त गरिएको छ । उहाँले २०१८ देखि अर्थमन्त्री मोहम्मद माईतको सहायकको रूपमा सेवा गर्नुभएको छ । युरोपेली युनियनका लागि इजिप्टका राजदूत बद्र अब्देलाट्टीको नेतृत्वमा परराष्ट्र र आप्रवासन र प्रवासी मामिला मन्त्रालयहरूलाई एउटै मन्त्रालयमा गाभिएको थियो । यसैबीच, शेरिफ फारुकले आपूर्ति र आन्तरिक व्यापार मन्त्रीको रूपमा शपथ लिनुभएको छ । करिम बदावीले पेट्रोलियम तथा खनिज स्रोत र महमुद इस्मातले विद्युत तथा नवीकरणीय ऊर्जामन्त्रीमा शपथ लिनुभएको छ । यातायात मन्त्री कामेल अल वाजिर र स्वास्थ्य मन्त्री खालिद अब्देल–गफ्फरले क्रमशः औद्योगिक विकास र मानव विकासका लागि उपप्रधानमन्त्रीको रूपमा काम गर्नुहुनेछ । शपथ ग्रहण समारोहअघि अल–सिसीले अब्देल–मागुइद सक्करलाई लेफ्टिनेन्ट जनरलको पदमा बढुवा गर्नुभयो र मोहम्मद जाकीको स्थानमा रक्षा र सैन्य उत्पादन मन्त्रीको रूपमा नियुक्त गर्नुभयो ।
