सांसदहरुले राज्य व्यवस्था तथा सुशासन समितिको बैठक बहिष्कार गरेका छन् ।
सिंहदरबारमा आईतबार बिहान बोलाइएको बैठकमा खाजासहित एनजिओको प्रवेश भएको पाइएपछि उपप्रधानमन्त्री तथा गृहमन्त्री रवि लामिछाने र समितिका सदस्यहरुले बैठक बहिष्कार गरेका हुन् । बैठकमा संघीय निजामती कर्मचारी सेवा सम्बन्धि विधेयकबारे छलफल गर्ने कार्यसूचि तय गरिएको थियो । समितिका सभापति रामहरी खतिवडाले बैठकमा एनजिओकर्मीहरु पनि देखापरेकाले बैठक बस्न नसकेको स्वीकार गर्नुभयो । उहाँले उपप्रधानमन्त्री तथा गृहमन्त्री लामिछानेले फेरि बैठकमा आउने कुरा गर्नुभएको तर नआएको पनि बताउनु भयो । बैठकपछि संघीय संसद भवन परिसरमा सञ्चारकर्मीमाझ सभापति खतिवडाले बैठकमा एनजिओको प्रवेशबारे स्पष्टिकरण दिनचाहनु भएन । तर उहाँले समितिको बैठकमा कुनैपनि एनजिओ, आईएनजिओलाई प्रवेश गर्न नदिने जिकिर गर्नुभयो ।
सभापति खतिवडाले भन्नुभयो, ‘राज्य व्यवस्था समितिको बिहान बैठक थियो । हामीले कर्मचारीको विधेयक सम्बन्धि छलफल थियो । सबै माननीय सदस्यहरु आउनु पनि भएको थियो । कर्मचारीको हड्ताल छ । तपाईले यहाँ पनि देखिहाल्नुभयो । मैले यहाँ पनि कुरा गरेँ । उहाँहरुले आएर समयमा गर्नुभएन । खाजाको व्यवस्था थियो । खाजा खाई पनि सक्नुभयो कसैले । कर्मचारीहरु पनि आउनुभएन । एनजिओले गरेको होकि भन्ने भयो । २ जना एनजीओकर्मी पनि त्यहाँ देखा पर्नुभयो । हामी एनजिओलाई कुनैपनि राज्य व्यवस्था समितिको मिटिङमा राख्दैनौं भनेर हामीले भन्यौं । केही साथीहरुले व्यवस्था गर्न खोज्नुभएको होला । तर राज्य व्यवस्था समितिको हल भित्र एनजिओका कार्यक्रमहरु हामी गर्न दिँदैनौं । मैले राज्य व्यवस्था समितिका सचिवलाई सोधेँ । आज खाजाको व्यवस्था गरिएको भनेर जानकारी गराउनु भयो । त्यसपछि हामीले एनजिओलाई त्यहाँबाट बाईकट ग¥यौं । हामी एनजिओलाई प्रवेश गर्न दिँदैनौं । एनजिओ÷आईएनजिओहरुलाई राज्य व्यवस्था समितिको कुनै पनि मिटिङमा हामी प्रवेश गराउँदैनौं । गृहमन्त्रीज्यूको कुरा म केही भन्दिन । म आउँछु भन्नु भएको थियो । बाहिर के भन्नुभयो ? एनजिओको कुरा त्यतिखेर आएको थिएन ।’
बैठकमा उपप्रधानमन्त्री लामिछाने र सांसदहरु बैठक नबसी हिँडेपछि सभापति खतिवडाले बैठक स्थगित गर्नुपरेको थियो । स्रोतका अनुसार बैठकमा उपप्रधानमन्त्री लामिछाने र सांसदहरुले एनजिओ प्रवेश गराएकाले बैठकमा बस्न नसकिने भन्दै बाहिरिएका थिए । सभापति खतिवडाले उपप्रधानमन्त्री लामिछानेले त्यस्तो भनेको आफूलाई थाहा नभएको बताएपनि बैठक नबसी बाहिरिएको स्वीकार गर्नुभयो ।
