सेन्दाई/जापान, प्रवासी नेपाली मञ्च जापान क्षेत्रीय कमिटी तोहोकु सेन्दाईको अध्यक्षमा अनिल गिरि दोहोरिएका छन्।
आइतबार टल्क नेट सेन्दाई (सिटि सेन्टर)मा भएको दोस्रो अधिवेशनले अध्यक्षमा अनिल गिरीलाई दोहोर्याएको हो।
उक्त पुनर्गठित कार्यसमितिको उपाध्यक्षमा सुरेश रावल , सचिवमा कपिलदत्त भट्ट उपसचिवमा नवराज चौलागाईं र अप्सरा कुँवर ‘अनुष्का’रहेका छन् भने सदस्यहरुमा राम गिरि, गगन सापकोटा , राजेन्द्र मिश्र , अमृता अर्याल , अनिल गौतम, अनिश सापकोटा, अनुज गोदार र विकास मिश्र रहेका छन्।
उक्त अधिबेशनको उद्घाटन गर्दै प्रवासी नेपाली मञ्च अन्तरराष्ट्रिय कमिटि सदस्य तथा जापान इन्चार्ज सुरेश केसीले जन्मथलो नेपाल भएर कर्मथलो जापानमा रहेका नेपालीहरु एकजुट हुनुपर्नेमा जोड दिए। उनले बिदेशमा भए पनि आफ्नो जन्मथलोलाई माया गर्दै आफ्नो संस्कृति र परम्परा जगेर्ना गर्नतर्फ ध्यान दिन पनि उनले अनुरोध गरे। उनले अघि थपे , “आजको दिनले हामीलाई हाम्रो जिम्मेवारी सम्झाएको छ। हाम्रो संस्कृति र परम्पराको संरक्षण गर्ने जिम्मा अबको युवा पुस्ताको हो। नयाँ पुस्तालाई हाम्रो नेपाली भाषा, पहिरन, र परम्परासँग जोड्नु अहिलेको आवश्यकता हो।”
बिशेष अतिथि प्रवासी नेपाली मञ्च जापानका अध्यक्ष कुलचन्द्र खरेलले युवा पुस्तालाई आफ्नो पहिचानप्रति गौरवान्वित हुन आग्रह गर्दै शिक्षा, व्यवसाय, र अन्य क्षेत्रमा युवाहरूलाई प्रोत्साहित गर्न आवश्यक रहेकोमा जोड दिए ।
प्रवासी नेपाली मञ्च जापान क्षेत्रीय कमिटी तोहोकु सेन्दाईका अध्यक्ष अनिल गिरीले नेपाली समुदाय जहाँ भए पनि, एकता सबैभन्दा ठूलो बल भएको जिकिर गर्दै आफ्नो भाषिक, जातीय, र सांस्कृतिक विविधताका बाबजुद सबै नेपाली एकजुट भएर समाज बिकासका लागि सशक्त रूपमा अघि बढ्नु पर्ने आबश्यकता औंल्याए। उनले, नेपालि समुदायमा देखिएका केही आर्थिक समस्या र वैदेशिक रोजगारीले सिर्जना गरेका मनोवैज्ञानिक प्रभावहरूको समाधानको लागि पनि सामूहिक पहल आवश्यक रहेको बताए ।
उक्त कार्यक्रम संचालन सुरेश रावलले गरेका थिए।
–अनुष्का कुवॅंर
