पोखरा १७ पूर्ण खोप सुनिश्चित वडा घोषणा

पोखरा, पोखरा महानगरपालिका वडा नं. १७ ले पूर्ण खोप सुनिश्चित वडा घोषणा गरेको छ। वडाभित्र अब कुनै पनि बालबालिका खोप सेवाबाट वञ्चित नहुने गरी आवश्यक व्यवस्था गरिएको वडा अध्यक्ष राधिका कुमारी शाहीले जानकारी दिइन्।
शहरी स्वास्थ्य केन्द्र पोखरा–१७ को परिसरमा आयोजित कार्यक्रममा अध्यक्ष शाहीले खोप अभियानलाई सफल बनाउन जनचेतनामूलक कार्यक्रम, स्वास्थ्य स्वयंसेविका, आमा समूह र स्वास्थ्यकर्मीहरूको समन्वयात्मक प्रयास निर्णायक भएको बताइन्। उनले भनिन्, “खोप नलगाएकाहरूलाई पहिचान गरेर सेवा दिनु र आम नागरिकमा सचेतना फैलाउनु हाम्रो प्राथमिकता थियो। अब बालबालिकाको पोषण र समग्र स्वास्थ्यमा ध्यान केन्द्रित गरिनेछ।”
कार्यक्रममा शहरी स्वास्थ्य केन्द्र प्रमुख श्रद्दा पौडेलले यो सफलता सामुदायिक सहभागिता र एकताकै प्रतिफल भएको उल्लेख गरिन्। “महिला स्वास्थ्य स्वयंसेविका, आमा समूह, स्वास्थ्यकर्मी र समुदाय सबैको एकताको कारण यो सम्भव भयो,” उनले भनिन्।
पोखरा महानगरपालिका स्वास्थ्य महाशाखा, वडा स्वास्थ्य समन्वय समिति र शहरी स्वास्थ्य केन्द्रको संयुक्त आयोजनामा सम्पन्न कार्यक्रममा विभिन्न संघसंस्था, विद्यालय, समुदाय प्रतिनिधि र नागरिकहरूको उल्लेख्य उपस्थिति रहेको थियो।
सो अवसरमा सुरुवातीदेखि सेवा पुर्‍याउँदै आएकी सेवा निवृत्त स्वास्थ्यकर्मी निर्मला अर्याललाई विशेष सम्मान गरिएको थियो।