नेपाल कम्युनिष्ट पार्टी (एमाले) कास्की क्षेत्र नं. २ का उम्मेदवार रश्मि आचार्यले नेताले जनता खोज्ने परिपाटी विकास गर्ने प्रतिबद्धता जनाएकी छन्। उनले आफू जनताको सेवक बन्न बाल्यकालदेखि नै राजनीतिमा लागेको उल्लेख गरे।
उम्मेदवार आचार्यले भने
‘जनताका साना-साना काम पनि प्रभावकारी नीति र कानुनको अभावमा अल्झिएका छन्। भएका योजनाका काम गुणस्तरीय हुन नसकेको भन्ने जनताको गुनासो सम्बोधन गर्न नीति र कानुन नै आवश्यक छ।’
बुधबार पोखरा महानगरपालिका वडा नं. १५ मा आयोजित मतदाता भेटघाट कार्यक्रममा बोल्दै आचार्यले जितेर नियमित कार्यतालिका बनाएर स्थानीयसँग समस्या र समाधानमा नजिकै रहँदै स्थानीय आवश्यकताका विकास निर्माणमा अग्रसर र सहकार्य गर्ने उल्लेख गरिन्।
‘प्रतिबद्धता पत्र यहाँहरूकै सल्लाहबाट तयार गरेको छु, अब सिर्जनात्मक तरिकाले कार्यान्वयन गर्छु,’ उनले भने।
उम्मेदवार आचार्यले अब ११ वटै वडाको सन्तुलित विकासको अवधारणाबाट अघि बढ्दै बृहत् पोखरा महानगरलाई स्थानीय तहको सहकार्यमा व्यवस्थित पर्यटनको शहर बनाउने उद्घोष गरिन्।
मतदाता भेटघाटमा एमालेका वरिष्ठ नेता सोम्नाथ अधिकारी प्यासि, केन्द्रीय सदस्यद्वय प्रभा कोइराला, मीना कुमारी गुरुङ, पूर्व केन्द्रीय सदस्य भीम कार्की, अनेम संघ केन्द्रीय सल्लाहकार सिर्जना शर्मा, एमाले कास्कीका कार्यवाहक अध्यक्ष भीष्मराज बराल, पोखरा महानगर कमिटी अध्यक्ष जीवन प्रसाद आचार्य सहित प्रदेश, जिल्ला र स्थानीय तहका नेता कार्यकर्ता सहभागी रहेको एमाले पोखरा १५ का अध्यक्ष माधवप्रसाद गौतमले जानकारी दिए।
