दमौली, तनहुँ ।
आगामी प्रतिनिधिसभा निर्वाचनलाई लक्षित गर्दै तनहुँ निर्वाचन क्षेत्र नम्बर १ मा चुनावी गतिविधि तीव्र बन्दै गएको छ । विभिन्न दलका चर्चित उम्मेदवार चुनावी मैदानमा उत्रिएसँगै प्रतिस्पर्धा रोचक बनेको छ । यसैक्रममा स्थानीय स्तरमा लामो समयदेखि सक्रिय रहँदै आएका विद्यनाथ ढकालले आफूलाई बलियो उम्मेदवारका रूपमा प्रस्तुत गरेका छन् ।
ढकालले नेपाली कम्युनिस्ट पार्टीको तर्फबाट उम्मेदवारी दिएका छन् । तनहुँ १ मा स्वर्णिम वाग्ले, गोविन्द भट्टराई र भगवती न्यौपाने लगायतका उम्मेदवारसँग उनको प्रतिस्पर्धा हुने देखिएको छ । स्थानीय भूगोल र जनतासँग नजिक रहेर काम गरेको अनुभवका कारण ढकाललाई मतदाताले चासोका साथ हेरेका छन् ।
करिब तीन दशक शिक्षण पेशामा संलग्न रहेका ढकाल स्थानीय स्तरमा विद्या सर का नामले परिचित छन् । उनी तनहुँको भानु नगरपालिका ४, चुँदीका स्थायी बासिन्दा हुन् । सरल जीवनशैली र स्थानीय मुद्दामा निरन्तर सक्रियताका कारण उनले मतदातामाझ अलग पहिचान बनाएका छन् ।
ढकालले मादी मस्याङ्दी मोटरमार्ग निर्माण, पर्यटन प्रवर्द्धन तथा जलाधार संरक्षणका विषयलाई प्राथमिकतामा राखेका छन् । विकास निर्माणका योजना र स्थानीय आवश्यकतामा आधारित एजेन्डा लिएर चुनावी अभियानमा सक्रिय रहेका उनले सुशासन र इमानदार राजनीतिको आवश्यकता औंल्याउँदै आएका छन् ।
लामो समयदेखि राजनीतिमा सक्रिय ढकालले विभिन्न उतारचढावका बीच पनि आफ्नो राजनीतिक यात्रालाई निरन्तरता दिएका छन् । मतदातासँग प्रत्यक्ष भेटघाट र घरदैलो कार्यक्रममार्फत उनले चुनावी अभियानलाई तीव्र बनाएका छन् ।
यसपटक तनहुँ १ मा ढकालको उम्मेदवारीले चुनावी प्रतिस्पर्धा थप रोचक बन्ने विश्लेषण गरिएको छ । स्थानीय मतदाताले विकास, सुशासन र जनतासँग नजिक रहने नेतृत्वको अपेक्षा गरेका छन् ।
