कास्की, फागुन १७ फागुन २१ गते हुने प्रतिनिधि सभा सदस्य निर्वाचन नजिकिँदै जाँदा कास्कीमा चुनावी माहोल तातेको छ। विभिन्न दलका उम्मेदवारहरू घरदैलो अभियानमा व्यस्त रहेका बेला ७८ वर्षीय वामपन्थी नेता सोमप्रसाद अधिकारी (प्यासि) पनि सक्रिय रूपमा प्रचारमा जुटिएका छन्।
कास्की निर्वाचन क्षेत्र नं. २ का उम्मेदवार रश्मि आचार्यको समर्थनमा अधिकारी घरदैलो अभियानमा सहभागी भइरहेका छन्। उमेर ढल्किँदै गए पनि उनको ऊर्जा र प्रतिबद्धतामा कुनै कमी नदेखिएको स्थानीय कार्यकर्ताहरू बताउँछन्। उनको उपस्थितिले चुनावी अभियानलाई थप उत्साह र भावनात्मक समर्थन मिलेको छ।
२०४३ सालको निर्वाचनमा जनपक्षीय उम्मेदवारका रूपमा विजयी भएका अधिकारीलाई मतदाताले अझै पनि सम्झिरहेका छन्। पञ्चायती व्यवस्थाको कठिन समयमा जनमतबाट विजयी बनेका उनी प्रजातन्त्र स्थापनापछि २०४८ सालको निर्वाचनमा पनि कास्की क्षेत्र नं. ४ बाट विजयी भएका थिए।
घरदैलो अभियानका क्रममा अधिकारीले “प्रचारमा उमेरले छेक्दैन, विचार र विश्वास बलियो हुनुपर्छ” भन्दै कार्यकर्तालाई प्रेरित गरिरहेका छन्। उनको सक्रियताले युवा पुस्तालाई पनि राजनीति र सामाजिक सेवामा लाग्न हौसला मिलेको बताइन्छ।
रश्मि आचार्यको अभियानमा अधिकारीको सहभागिता केवल समर्थन मात्र नभई एक पुस्ताबाट अर्को पुस्तामा राजनीतिक अनुभव हस्तान्तरणको संकेतका रूपमा पनि हेरिएको छ। लामो राजनीतिक यात्राले उनलाई मतदातामाझ विश्वासिलो नेताका रूपमा स्थापित गरेको छ।
घरदैलोका क्रममा स्थानीय मतदाताले पुराना संघर्षका दिन सम्झिने गरेका छन् भने युवा पुस्ताले उनलाई जीवित इतिहासका रूपमा चासोका साथ हेर्ने गरेका छन्। चुनावी माहोलबीच अधिकारीको सक्रियता कास्की क्षेत्र नं. २ मा विशेष आकर्षण बनेको छ।
