पोखरा ।पोखरा महानगरपालिका ६ लेकसाइडस्थित लालुपाते मार्गमा शंकास्पद झोलामा भेटेनरीको सामान भेटिएको छ । लेकसाइड स्ट्रिट नम्बर ४१ लालुपाते मार्गमा रहेको एक पसलमा एक अपरिचत व्यक्तिले राखेर गएको झोलाबाट गन्ध आएपछि प्रहरीलाई खबर गरेका थिए ।
शंकास्पद वस्तु फेला परेको सूचनापछि आर्मीको बम डिस्फोजल टोली समेत पुगेको थियो । स्रोतका अनुसार पोखराको एक मतदान केन्द्रमा खटिएका कर्मचारीले पसलमा झोला राखेका थिए ।शंकास्पद वस्तु राखेको समाचार पछि उनले झोला आफ्नो भएको बताउँदै आएपछि स्थानीय आक्रोसित भएपछि वडा प्रहरी कार्यालय बैदामले उनलाई नियन्त्रणमा लिएको छ ।
जिल्ला प्रहरी कार्यालय कास्कीका सूचना अधिकारी एवम् प्रहरी नायव उपरीक्षक हरिबहादुर बस्नेतले झोला राख्ने व्यक्तिलाई नियन्त्रणमा लिएको पुष्टि गरे ।‘लेकसाइडमा भेटिएको शंकास्पद वस्तुको डिस्फोजको तयारी भइरहँदा झोला राखेर गएका व्यक्ति आए थिए’, उनल भने, ‘उनले राखेर गएको झोलामा नाइट्रोजन ग्यास लगायतका सामानहरु थिए, झोला मेरो भन्दै सम्बन्धित व्यक्ति आउँदा स्थानीयहरु आक्रोसित भएपछि सुरक्षाका लागि नियन्त्रणमा लिएका हौं ।’
उनलाई अहिले वडा प्रहरी कार्यालय बैदाममा राखिएको छ । उनको झोलामा भेटिएको पत्र अनुसार उनी पोखराको तालबाराही मावि बैदाम ‘ख’ मतदान केन्द्रमा सहायक कर्मचारीको रुपमा खटिएका छन् ।
