खोटाङ । खोटाङको केपिलासगढी गाउँपालिकामा बुधबार दिउँसो एयर डाइनेष्टीको हेलिकोप्टर दुर्घटनामा परेको छ । केपिलासगढी गाउँपालिका २ खार्ताम्छाको बालाबेसीमा दिउँसो १२ बजेर २ मिनेट जाँदा सो दुर्घटना भएको हो । नाइन एन एएचक्यु कलसाइनको हेलिकोप्टर अवतरण गर्ने क्रममा अनियन्त्रित भई भित्तामा ठोक्किएको प्रहरीले जनाएको छ ।
हेलिकोप्टरमा सवार चालकसहित सबै सुरक्षित छन् । काठमाडौंबाट एक व्यक्तिको शव र परिवारका ५ जना सदस्य लिएर हेलिकोप्टर गाउँ पुगेको थियो । अवतरणका क्रममा तीव्र हावाको बेगका कारण हेलिकोप्टर सन्तुलन गुमाएर पल्टिएको जिल्ला प्रहरी कार्यालय खोटाङले जनाएको छ । ‘काठमाडौंबाट आमाको कामका लागि परिवारका ५ जना आउनुभएको रहेछ,’ एक प्रहरी अधिकृत भने ‘त्यसक्रममा हावाको बेगले अनियन्त्रित भई हेलिकोप्टर पल्टिएको छ ।हेलिकोप्टर पल्टिँदा सोही ठाउँका ५० वर्षीय काजीबहादुर राई घाइते भएका छन् । उनलाई उपचारका लागि तत्कालै एयर डाइनेष्टीकै अर्को हेलिकोप्टर मगाएर काठमाडौं पठाइएको छ । प्रमुख जिल्ला अधिकारी रेखा कँडेलले हेलिकोप्टर सामान्य दुर्घटनामा परेको र कुनै मानवीय क्षति नभएको जानकारी दिइन् । उनले भनिन्, ‘हेलिकोप्टर दुर्घटना भएको हो, मानवीय क्षति भएको छैन ।’
हेलिकोप्टरका पाइलट सविन थापा र अन्य ५ जना यात्रुको अवस्था सामान्य रहेको प्रहरीको भनाइ छ । केपिलासगढी गाउँपालिका अध्यक्ष समिर राईका अनुसार बारीको डिलमा अवतरण गर्ने प्रयास गर्दा सो दुर्घटना भएको हो । सुरुमा डिलमा बस्न लागेको हेलिकोप्टरलाई पाइलटले पुनः उठाएर बारीको बीचमा लैजान खोज्दा सन्तुलन बिग्रिएको थियो ।
प्रहरीले घटनाको विस्तृत विवरण संकलन गरिरहेको छ । घाइतेको उपचार र दुर्घटनाको कारणबारे थप अनुसन्धान भइरहेको प्रहरीले जनाएको छ ।
