पोखरा । पोखरा महानगरपालिका वडा नं ३३ भरतपोखरीस्थित चण्डी माध्यमिक विद्यालयको ६२औँ वार्षिकोत्सव एवं ६३औँ अभिभावक दिवस विभिन्न कार्यक्रमका साथ सम्पन्न भएको छ ।
कार्यक्रम उद्घाटन गर्दै पोखरा-३३ का वडाध्यक्ष रामचन्द्र अधिकारीले शैक्षिक गुणस्तरीयतासँगै विद्यार्थीलाई नैतिकवान बनाउन लाग्नुपर्नेमा जोड दिए ।
विद्यालयका आवश्यक भौतिक पूर्वाधारका लागि वडाका तर्फबाट सहयोग गर्ने विश्वास व्यक्त गर्दै उनले सबैको साथ र सहयोगमा यस क्षेत्रको समग्र विकास गर्न सकिने बताए ।
भरतपोखरी आँफैंमा धेरै सम्भावना बोकेको क्षेत्र भएको भन्दै उनले यहाँ हुने हरेका विकास निर्माण योजनालाई सफल बनाउनका लागि सबैले आ आफ्ना तर्फबाट सहयोग गर्नुपर्नेमा जोड दिए ।
पूर्वविद्यार्थी एवं पत्रकार वासुदेव पौडेलले धेरै आरोहअवरोह पार गर्दै विद्यालयले यस क्षेत्रको शैक्षिक जागरणमा विशिष्ट भूमिका खेलेको बताए । शैक्षिक गुणस्तरीयतासँगै विद्यार्थीलाई नैतिकवान बनाउने गरी विद्यालय परिवार लाग्नुपर्नेमा उनले जोड दिए ।
शिक्षासेवी एवं अक्षयकोषदाता पिताम्बर पौडेलले स्थापनाकालदेखि बर्तमानसम्म यहाँका स्थानीय समाजसेवी, बुद्धिजीविको अथक प्रयासकै कारण विद्यालय यस अवस्थासम्म आइपुुगेको बताए ।
विद्यालयका प्रधानाध्यापक खिमबहादुर महतले विद्यालयको समग्र आर्थिक, शैक्षिक एवं भौतिक प्रगति र भावी योजनाबारे जानकारी गराए ।
विद्यालय व्यवस्थापन समिति अध्यक्ष रुमबहादुर क्षेत्रीले सबैको साथ र सहयोगमा विद्यालयको सर्वाङ्गिण विकास गर्न सकिने बताउँदै सबैको सहयोगको अपेक्षा गरे ।
कार्यक्रममा पूर्वशिक्षिका सरस्वती खत्री, अक्षयकोष दाताको सम्मानसँगै कक्षागत रुपमा विभिन्न विधामा उत्कृष्ट विद्यार्थीलाई पुरस्कृत गरिएको थियो ।
कार्यक्रममा विद्यालय व्यवस्थापन समितिका पूर्व अध्यक्ष एवम् सल्लाहकार चेतबहादुर महत, शिक्षक अभिभावक संघका पूर्वअध्यक्ष कमलप्रसाद पौडेल, नेकपा एमाले पोखरा महानगपालिका वडा नं ३३ का अध्यक्ष टुकराज भण्डारी, विद्यालयकी छात्रा लक्ष्मी केसीलगायतले बोलेका थिए ।
अध्यक्ष क्षेत्रीको अध्यक्षतामा भएको कार्यक्रमकको सञ्चालन शिक्षकद्वय कमलप्रसाद पौडेल र सन्तोष लामिछानेले सञ्चालन गरेका थिए ।
कार्यक्रममा अभिभावक र विद्यार्थीले भजन, गीत, नृत्यलगायतका प्रस्तुति राखेका थिए ।
