पोखरा । महिलाको पाठेघरको मुखमा हुने क्यान्सरविरुद्ध लगाइने एचपीभी खोप अभियान पोखरामा जारी छ । मङ्गलबारदेखि पोखरा-५ बाट शुरु भएको अभियान दोस्रो पोखरा १२ मा भएको हो ।
पोखरा-१२ स्थित शीतलादेवी माविमा स्वास्थ्य तथा जनसङ्ख्यामन्त्री प्रदीप पौडेलले अभियान शुभारम्भ गरे । कार्यक्रममा मन्त्री पौडेलले पाठेघरको क्यान्सरविरुद्धको ‘एचपीभी’ खोप अभियान नेपाललाई भविष्यमा स्वस्थ बनाउन शुरु गरिएको बताए ।
उनले यो खोपबाट कोही पनि किशोरी बञ्चित हुन नदिन सबैले आआफ्नो ठाउँबाट प्रचार-प्रसार र सहयोग गर्न आग्रह गरे ।
मन्त्री पौडेलले भने, ‘देशैभर खोप र जनशक्ति पुगेकाले लक्षित वर्ग खोपबाट नछुटुन् भन्ने उद्देश्य सरकारको छ, निरोगी नेपाल बनाउन यसले सहयोग पुर्याउनेछ, भविष्यमा नेपाललाई स्वस्थ बनाउन अभियानले काम गर्नेछ ।’
अभियानका क्रममा पोखरा भित्रका करिब २३ हजार सात सय ४८ किशोरीलाई लगाइने छ । फाल्गुन ६ गतेसम्म महानगरका दुई सय ७५ विद्यालय र ४७ वटा स्वास्थ्य संस्थामा तीन सय ४४ जना स्वास्थ्यकर्मी र छ सय ८८ जना स्वयंसेवक परिचालन गरी यो खोप अभियान सुरुवात गरिएको हो ।
विद्यालय उमेरका कक्षा ६ देखि १० र विद्यालय बाहिर रहेका १० देखि १४ वर्षसम्मका बालिका तथा किशोरीहरूलाई यो खोप प्रदान गर्न लागिएको हो ।
मन्त्रालयले निःशुल्क एचपीभी खोप अभियान आगामी फागुन ६ गतेसम्म देशभर सञ्चालन गरेको छ । कुल १६ लाख ८८ हजार सात सय ६८ किशोरीलाई खोप दिइने लक्ष्य सरकारको छ ।
नेपालमा पाठेघरको मुखमा हुने क्यान्सरको रोकथामका लागि १० देखि १४ वर्षसम्मका किशोरीलाई एचपीभी खोप लगाउने, ३० वर्ष माथिका महिलाको पाठेघरको मुखको परीक्षण (स्क्रिनिङ) गर्ने र पाठेघरको मुखको क्यान्सर रोग निदान भएका महिलाको नियमित उपचार गर्नेलगायतका प्रयास भइरहेको बताइन्छ ।
नेपालमा नसर्ने रोगको भार बढिरहेको छ । जसमा क्यान्सरको भार झन् बढ्दो छ । हरेक दिन छ जनामा पाठेघरको मुखको क्यान्सर देखिने र चार जनाको मृत्यु हुने गरेको तथ्यांक छ ।
