पोखरा । बलियो प्रतिद्वन्दी त्रिभुवन आर्मी क्लबलाई पराजित गर्दै चर्च ब्वाइज युनाइटेड क्लब पोखरामा जारी चौविसौँ आहा रारा पोखरा गोल्डकप फुटबल प्रतियोगिताको सेमिफाइनलमा प्रवेश गरेको छ ।
आज भएको क्वाटरफाइनल खेलमा त्रिभुवन आर्मीबिरुद्ध चर्च ब्वाइजले १-० गोलको संघर्षपूर्ण जित निकालेको हो । चर्च ब्वाइजलाई जिताउन राज भुषालले महत्वपूर्ण योगदान दिए ।
भुषालले खेलकाे ८९औँ मिनेटमा गोल गर्दै टोलीलाई सेमिफाइनलमा पुर्याए । नवीन लामाकाे गरेको कर्नर प्रहारलाइ उनले हेडमार्फत गोल गरेका हुन् । चर्च ब्वाइजले अब फाइनल प्रवेशका लागि नेपाल पुलिस क्लबको सामना गर्नेछ ।
मंगलबार भारतको थण्डरबोल्ट नर्थ युनाइटेड र उज्वेकिस्तानको ब्ल्याक बुल्स एफसीबीचको चौथो तथा अन्तिम क्वाटरफाइनल खेल हुनेछ ।
भारतको थण्डरबोल्ट नर्थ युनाइटेडले प्रिक्वाटरफाइनलमा संकटा क्लबलाई पराजित गरी क्वाटरफाइनल प्रवेश गरेको टिम हो भने उज्वेकिस्तानको ब्ल्याक बुल्स एफसी बाई पाएर सिधै क्वाटरफाइनल खेल्न लागेको हो ।
प्रतियोगितामा एक करोड ५१ लाख आम्दानी, एक करोड ४२ लाख खर्च र आठ लाख ८० हजार बचत हुने आयोजक सहारा क्लबको अनुमान छ ।
यसवर्ष प्रतियोगिता विजेताले १२ लाख एक हजार र उपविजेताले छ लाख एक हजार रुपैयाँ नगद पुरस्कार प्राप्त प्राप्त गर्ने सहारा क्लबले जनाएको छ ।
