पोखरा । नौ दिन अघि त्रिशूली नदीमा खसेर बेपत्ता भएका युव मृत भेटिएका छन् । लमजुङको साविक चन्द्रेश्वर गाविस वडा नं ३ घर भई हाल चितवनको भरतपुर महानगरपालिका-१ रामनगर बस्ने वर्ष २७ को रोहित राना आइतबार बिहान मृतावस्थामा भेटिएका हुन् ।
यही फागुन २ गते उनी मुग्लिन-नारायणगढ सडक खण्डअन्तर्गत चितवनको इच्छाकामना-५ स्थित ३ नम्बर पुलबाट मोटसाइकल दुर्घटना भई त्रिशूली नदीमा खसेर बेपत्ता भएका थिए ।
इलाका प्रहरी कार्यालय मुग्लिनका प्रमुख प्रहरी निरीक्षक निरला भण्डारीका अनुसार दुर्घटना भएको करिब एक सय मिटर तल नदीमा तैरिरहेको अवस्थामा शव फेला परेको हो ।
रानाको शवलाई सशस्त्र प्रहरी र नेपाल प्रहरीको संयुक्त टोलीले नदीबाट उद्धार गरी शव परीक्षणका लागि भरतपुर अस्पताल पठाइएको प्रहरी निरीक्षक भण्डारीले बताए । निरीक्षक भण्डारीका अनुसार रोहितका परिवारले शव सनाखत गरिसकेका छन् ।
नारायणगढबाट काठमाडौँतर्फ जाँदै गर्दा रोहित सवार बा ०६-०२ प ९२०४ नम्बरको मोटरसाइकल दुर्घटना भएको थियो । मोटरसाइकल सडकमै अडिएको थियो भने रोहित त्रिशूलीमा खसेका थिए । रोहित भारतीय सेनामा कार्यरत थिए ।
