पोखरा। गण्डकी प्रदेश प्रशिक्षण प्रतिष्ठानको आयोजना तथा जिल्ला समन्वय समिति महासंघ गण्डकी प्रदेश समितिको समन्वयमा गण्डकी प्रदेशका ११ जिल्लाका पदाधिकारी तथा सदस्यका लागि दुई दिने क्षमता विकास तालिम शुरु भएको छ ।
तालिमको जिल्ला समन्वय समिति महासंघ गण्डकी प्रदेश समितिका अध्यक्ष लीलाधर पौडेलले उद्घाटन गरेका थिए ।
पौडेलले समन्वय र अनुगमनलाई थप सहयोग र सहजीकरणसहित क्षमता विकास गर्ने उद्देश्यले विगत तीन बर्षदेखि लगातार तालिम आयोजना गरिएको भन्दै प्रभावकारी र सक्रियताका साथ सहभागी हुन आग्रह गरे ।
पौडेलले क्षमताको विकास निरन्तर हुनुपर्ने बन्दै समयानुकूल परिमार्जित र परिस्कृत तवरले कार्य सम्पादनमा तालिम फलदायी हुने विश्वास व्यक्त गरे ।
गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेले प्रतिष्ठानको स्थापना कालदेखि करिब १८ हजार कर्मचारी र जनप्रतिनिधिलाई क्षमता विकासका तालिम संचालन गरिएको जानकारी दिदै तालिम प्रभावकारी कार्यक्षमतामा उपयोगी भएको उल्लेख गरे ।
प्रशिक्षणमा जिल्ला समन्वय समितिको काम कर्तव्य र अधिकारसम्बन्धी व्यवस्था र यसको कार्यान्वयनको अवस्था, अनुगमन तथा मूल्यांकन सम्बन्धित कानूनी व्यवस्था विकास र यसमा आएको परिवर्तन र जिससको भूमिका विषयमा जानकारी गराइएको थियो ।
यसैगरी स्थानीय तहको योजना तर्जुमा र कार्यान्वयन प्रक्रिया र जिससको भूमिका, शासकीय क्षमता अभिवृद्धिका आयाम र जिसस को भूमिका, सुशासनका औजार, अनुगमन तथा मूल्यांकनका औजार, स्थानीय आर्थिक विकासको अवधारणा र जिससको भूमिका विषयमा प्रशिक्षण हुनेछ ।
गण्डकी प्रदेशका ११ जिल्लाका जिल्ला समन्वय समितिका प्रमुख, उपप्रमुखसहित सदस्य सहभागी प्रशिक्षणमा नेपाल सरकारका पूर्व सचिवद्वय काशीराज दाहाल र रेश्मीराज पाण्डेसहितले सहजीकरण गरेका छन् ।
गण्डकी प्रदेश प्रशिक्षण प्रतिष्ठानका कार्यकारी निर्देशक ऋषिराम पाण्डेको अध्यक्षतामा भएको कार्यक्रममा प्रतिष्ठानका उपसचिव नारायण प्रसाद पौडेलले स्वागत र संचालन शाखा अधिकृत जीतबहादुर रानाले गरेका थिए ।
