पोखरा । शनिबार वर्षा भएको पोखरामा आज भने वर्षा हुने सम्भावना छैन । पोखरामा शनिबार दिउँसो ४ देखि राति करिब ८ बजेसम्म चट्याङ, मेघगर्जनसहित हल्का वर्षा भएको थियो । वर्षापछि पोखरामा चिसो महसुस गरिएको छ ।
आज आइतबार भने बिहानैदेखि मौसम खुलेको छ । आज बिहान ८ बजे पोखराको न्यूनतम् तापक्रम १३ डिग्री सेल्सियस रहेको छ भने दिउँसो २१ डिग्री पुग्ने अनुमान गरिएको छ ।
आज पोखराको सापेक्षित आद्रता ५५ प्रतिशत रहेको छ भने मौसम आंशिक घमाइलो हुने अनुमान छ ।
हाल देशमा पश्चिमी न्यूनचापीय प्रणाली तथा स्थानीय वायुको आंशिक प्रभाव रहेकोले कोशी, बागमती र मधेस प्रदेश देशका पहाडी भूभागमा आंशिकदेखि साधारणतया बदली रही बाँकी भागमा मौसम सफा रहेको जल तथा मौसम पूर्वानुमान महाशाखाले जनाएको छ ।
बिहान कोशी र मधेस प्रदेशका एक-दुई स्थानमा मेघगर्जन र चट्याङसहित हल्का वर्षा भइरहेको महाशाखले जनाएको छ ।
आज दिउँसो गण्डकी, कोशी, मधेस र बागमती प्रदेशमा आंशिकदेखि साधारणतया बदली रही बाँकी प्रदेशमा मौसम सफा रहने बताइन्छ ।
साथै कोशी र बागमती प्रदेशका केही स्थान एवं गण्डकी र मधेस प्रदेशका एक-दुई स्थानमा मेघगर्जन र चट्याङसहित हल्का वर्षाको सम्भावना छ ।
गण्डकी, कोशी र बागमती प्रदेशका उच्च पहाडी तथा हिमाली भागका एक-दुई स्थानमा हल्का हिमपातको सम्भावना रहेको महाशाखाले आफ्नो बुलेटिनमा उल्लेख गरेको छ ।
आज राति पनि कोशी प्रदेशमा आंशिक बदली रही बाँकी प्रदेशमा मौसम सफा रहने छ । कोशी प्रदेशका एक-दुई स्थानमा मेघगर्जन र चट्याङसहित हल्का वर्षाका साथै उच्च पहाडी तथा हिमाली भागका एक-दुई स्थानमा हल्का हिमपातको सम्भावना रहेको महाशाखाले जनाएको छ ।
