पोखरा । पाेखराबाट अमेरिकी नागरिकलाई अपहरण गरेर चार कराेड रूपैयाँ फिराैती माग गर्ने एक महिला कास्की प्रहरीको फन्दामा परेकी छन् । पक्राउ पर्नेमा नुवाकोट बेलकोटगढी नगरपालिका वडा नं ४ की ३७ वर्षीया सरिता लामा छन् ।
लामाले मुक्तिनाथ मन्दिर भ्रमणका लागि अकमेरिकादेखि नेपाल आएर पोखराको लेकसाइडस्थित एक होटलमा बस्दै आएकी ७० वर्षीया महिलालाई अपहरण गरी तीन लाख रुपैयाँ फिरौती माग गरेकी थिए ।
ती महिला अपहरणमा परेको भन्ने अमेरिकी राजदूतावासले प्रहरीलाई सूचना दिएपछि केन्द्रीय अनुसन्धान ब्युरो र मकवानपुर प्रहरीको सहयोगमा लामालाई पक्राउ गरिएको जिल्ला प्रहरी कार्यालय कास्कीका सूचना अधिकारी प्रहरी निरीक्षक अविनाश दीप जिसीले जानकारी दिए ।
पीडित महिलालाई मकवानपुरको हेटौंडा उपमहानगरालिका वडा नं १९ नेवारपानीबाट सकुशल उद्दार गरिएको प्रहरीले जनाएको छ । घटनाको प्रकृति हेर्दा पीडित महिलालाई भारतसम्म लैजाने तयारी रहेको प्रहरीको भनाइ छ ।
लामाले ती महिलासँग तीन लाख यूरो अर्थात करिब चार करोड नेपाली रुपैयाँ फिरौती माग गरेकी थिइन् ।
समाचार स्रोतका अनुुसार पीडित महिलासँग लामाको सामान्य चिनजान थियो । ती महिलाले नेपालमा रहँदा घुम्ने ठाउँको बारेमा लामाले जानकारी गराएकी थिइने ।
सोही क्रममा पोखराको लेकसाइडस्थित एक होटलमा बसिरहेकी ती महिलालाई लामाले आफ्नो घर लैजाने भनि लगिन् । तर लामाले ती महिलालाई घर नलगि अन्यत्रै लगिन् ।
पोखराबाट चितवन, हेटौँडा हुँदै पर्सासम्म पुर्याएर लामाले ती महिलासँग चार करोड रुपैयाँ माग्दै धम्क्याउनसमेत थालेकी थिइन् ।
पक्राउ गरेकी लामालाई कास्की जिल्ला अदालतबाट अपहरण तथा शरीर बन्धक कसूरमा ७ दिनको म्याद थपेर अनुसन्धान थालिएको छ ।
