पोखरा । पोखरा महानगरपालिका वडा नं १२ स्थित पोखरा युनाइटेड एकेडेमीमा कक्षा १२ मा अध्ययनरत विद्यार्थीको बिदाई भएको छ ।
कक्षा ११ मा अध्ययनरत विद्यार्थीले एक कार्यक्रम आयोजना गरी कक्षा १२ का ९० जना विद्यार्थीलाई मायाको चिनो प्रदान गरी बिदाई गरेको हो ।
बिदाई भएका विद्यार्थी आगामी वैशाख ११ गतेदेखि सञ्चालन हुने परीक्षामा सहभागी हुँदैछन् । यी विद्यार्थीले भद्रकाली मावि केन्द्रमा परीक्षा दिँदैछन् ।
कार्यक्रममा विद्यालय व्यवस्थापन समिति अध्यक्ष शिवबहादुर भण्डारी, प्राचार्य बयानबहादुर गोदार, सहायक प्राचार्यद्वय देवेन्द्र अधिकारी, गोविन्द चापागाईंलगायतले बिदाई गरेका हुन् ।
कार्यक्रममा अध्यक्ष भण्डारीले परीक्षाका लागि राम्रो मेहनत गर्न र मर्यादित भएर परीक्षामा सहभागी हुन आग्रह गरे । कक्षा १२ को परीक्षाले समग्र भविष्य निर्धारण गर्ने भएकाले सोही अनुसार तयारी गर्नुपर्ने बताए ।
प्राचार्य गोदारले विगतका परीक्षामा पनि राम्रो नजिता हासिल गरेको र यस पटक विगतमा भन्दा राम्रो हुने विश्वास व्यक्त गरे । उनले उच्च मनोवलका साथ परीक्षामा सहभागी हुन विद्यार्थीलाई आग्रह गरे ।
कार्यक्रममा विद्यालयका सहायक प्राचार्यद्वय देवेन्द्र अधिकारी, गोविन्द चापागाईं, शिक्षक फणीन्द्रराज पौडेल, शिक्षक कक्षा १२ की रेजिना शर्मालगायतले बोलेका थिए ।
कक्षा ११ का विद्यार्थी मोहित नेपालीको अध्यक्षतामा भएको कार्यक्रमको सञ्चालन अनुपमा बराल, आशिका भुजेल र समीक्षा शर्माले गरेका थिए ।
कार्यक्रममा विद्यार्थीले विभिन्न सांस्कृति प्रस्तुतिसमेत राखेका थिए ।
२०५० सालमा स्थापित विद्यालयमा हाल आठ सय ५० विद्यार्थी रहेकामा कक्षा ११ र १२ मा मात्रै दुई सय २० विद्यार्थी छन् ।
विद्यालयका कक्षा ११ र १२ मा विज्ञान, व्यवस्थापन र होटल व्यवस्थापनको पढाई हुँदै आइरहेको छ । आगामी दिनमा मोवाइल, टीभी र अन्तर्राष्ट्रिय भाषासँग सम्बन्धित कक्षा सञ्चालनको तयारी गरिएको विद्यालयले जनाएको छ ।
