वैशाख १०, पोखरा
पोखरा महानगरपालिका वडा नं. ७ का वडा अध्यक्ष राम मोहन आचार्यले पोखरा महानगरपालिका वडा नं. १७, बिरौटामा सञ्चालित ऐतिहासिक श्री गण्डकी शत कुण्डीय गायत्री कोटिहोम विराट ज्ञान महायज्ञको दर्शन नगर्ने व्यक्ति पोखरेली हुन नसक्ने बताएका छन्। मंगलबार महायज्ञमा प्रमुख अतिथिका रूपमा सहभागी हुँदै अध्यक्ष आचार्यले यस्तो विचार व्यक्त गरे।
“यो कोटिहोम महायज्ञले हामी सबैलाई धार्मिक बनाउने छ। पछिल्लो समयको विकृति हटाउन पनि यो महायज्ञ प्रभावकारी हुनेछ। म त भन्छु, हाम्रो क्षेत्रमा सञ्चालित यस्तो कोटिहोम महायज्ञको दर्शन नगर्ने व्यक्ति पोखरेली हुन सक्दैन,” उनले भने। “हाम्रो ठाउँमा यस्तो महायज्ञ सञ्चालन हुँदा हामी अत्यन्तै खुशी छौं। यो बेला साथ र सहयोग नगरे हामी सबैका लागि ठूलो भूल हुनेछ।”
त्यस्तै, उनले सन् २०२५ लाई पोखरा महानगरपालिकाले घोषणा गरेको पर्यटन वर्षलाई सफल बनाउन यस्ता महायज्ञजस्तो महत्वपूर्ण माध्यम अरू नहुने बताए।
महायज्ञको पूर्वसन्ध्यामा हाल श्रीमद्भागवत कथा प्रवचन सञ्चालन भइरहेको छ। चर्चित अन्तर्राष्ट्रिय कथावाचक देवी प्रतिभा, सुप्रिया किशोरीलगायतले कथा प्रवचन गरिरहेका छन्। पछिल्लो समय भक्तजन र दानवीरहरूको उपस्थिति पनि बाक्लिँदै गएको छ।
