पोखरा । पोखरा महानगरपालिका वडा नं ८ लाई पूर्णखोप सुनिश्चितता तथा दिगोपना वडा घोषणा गरिएको छ । पोखरा महानगरकी उपप्रमुख मञ्जुदेवी गुरुङको उपस्थितिमा आइतबार पूर्णखोप सुनिश्चितता तथा दिगोपना वडा घोषणा गरिएको हो ।
पूर्णखोप सुनिश्चितताका लागि स्वास्थ्यकर्मी तथा महिला सामुदायिक स्वास्थ्य स्वयंसेविकामार्फत घरधुरी सर्वेक्षणसमेत गरिएको अधिकारीहरूले बताएका छन् । सोही अवसरमा वडा कार्यालयले पूर्णखोप सुनिश्चितताको प्रतिबद्धता पत्रसमेत जारी गरेको छ ।
प्रतिबद्धता पत्रअनुसार २०८२ जेठ ४ गतेसम्मा आठदेखि १८ महिनासम्मका सबै बालबालिकालाई राष्ट्रिय खोप तालिका अनुसार सबै खोपको मात्रा दिइसकिएको छ ।
कार्यक्रममा “खोप शुल्कमा पाईंदैन”, “खोप सुरक्षित हुन्छ” र “खोपले जीवन रक्षा गर्छ” जस्ता नारासहित खोपको महत्वबारे जानकारीमूलक सन्देश प्रस्तुत गरिएको थियो ।
कार्यक्रममा महानगरकी उपप्रमुख गुरुङले पोखरा महानगरपालिका वडा नं ८ ले आफ्ना सबै बालबालिकालाई खोपको माध्यमबाट सुरक्षित गरेर एक महत्वपूर्ण पाइला चालेको बताइन् ।
उनले यो कार्य अन्य वडाका लागि अनुकरणीय हुने बताइन् । बालबालिकाको सुरक्षित भविष्यमा लागि खोप एक प्रभावकारी र अत्यावश्यक कार्यक्रमका रूपमा सञ्चालन गरिएको उनले बताइन् ।
महानगरपालिका क्षेत्रमा रहेका सबै बालबालिकालाई समयमा नै खोप उपलब्ध गराउने दायित्वप्रति आफूहरू प्रतिबद्ध रहेको उनको भनाइ छ । बालबालिकाको स्वास्थ्य सुरक्षा विना स्वस्थ नागरिकको सामाजिक आवश्यकता पूर्ति गर्न नसकिने उनले स्पष्ट पारिन् ।
स्वास्थ्य महाशाखा प्रमुख भरतराज पौडेलले आफूहरूको महानगरपालिकालाई पूर्ण खोप सुनिश्चिततासहित दिगोपना घोषणाको क्रममा रहेको बताए ।
पोखरा महानगरपालिका वडा नं.८ का वडाध्यक्ष रुद्रनाथ बरालले आफ्नो वडाको बढ्दो जनघनत्वका बाबजुद बालबालिकाको स्वास्थ्य प्रवर्द्धन र आधारभूत खोपको सुविधा उपलब्ध गराउन प्रतिबद्ध रहेको बताए ।
पोखरा ७ का वडाध्यक्ष राममोहन आचार्यले बालबालिकाको स्वास्थ्यका विषयमा अभिभावकको चासो पनि उत्तिकै महत्त्वपूर्ण हुने बताए ।
पोखरा महानगरपालिका स्वास्थ्य व्यवस्थापन समिति उपाध्यक्ष पूर्ण लामाले नागरिकको समग्र स्वास्थ्यलाई व्यवस्थित र दिगो बनाउन बाल्य अवस्थाबाटै पाउनु पर्ने आधारभूत सेवाहरूको नियमिततामा जोड दिए ।
महिला सामुदायिक स्वास्थ्य स्वयंसेविका सञ्जाल कास्कीकी अध्यक्ष भीमा पौडेलले बालबालिकालाई आवश्यक खोप तथा पोषणका कार्यक्रम प्रभावकारी रूपमा सञ्चालन गर्ने हरेक अभियानमा महिला स्वयंसेविकाको भूमिका उल्लेखनीय हुने गरेको बताइन् ।
शहरी स्वास्थ्य प्रवर्द्धन केन्द्रका प्रमुख कुश्मराज सुवेदीले यस अभियानमा जनप्रतिनिधि, स्वास्थ्यकर्मी, महिला सामुदायिक स्वास्थ्य स्वयंसेविका, स्थानीय राजनीतिक दलहरू, नागरिक समाजलगायतको भूमिका महत्वपूर्ण रहेको बताए ।
वडासदस्य गोविन्द बराल र शहरी स्वास्थ्य प्रवद्र्धन केन्द्रका प्रमुख कुशुमराज सुवेदीले पूर्णखोप सुनिश्चितताका लागि चालिएका कदमबारे जानकारी गराएका थिए ।
कार्यक्रम पोखरा-८ का वडाध्यक्ष रूद्रनाथ बरालको अध्यक्षतामा भएको थियो ।
महानगरका ३१ वटा वडा पूर्ण खोप सुनिश्चितता दिगोपना घोषणा भइसकेका छन् भने बाँकी दुई वडा घोषणा हुने क्रममा छन् । यही ज्येष्ठ १० गतेभित्र महानगरपालिकालाई नै पूर्ण खोप सुनिश्चितता दिगोपना घोषणा गर्ने तयारी गरिएको छ ।
