पोखरा । हाल देशमा पश्चिमी तथा स्थानीय वायुको प्रभाव रहेको छ । साथै बङ्गालको खाडी र अरब सागरबाट आएको जलवाष्पयुक्त हावाको पनि आंशिक प्रभाव रहेको मौसम पूर्वानुमान महाशाखाले जनाएको छ ।
महाशाखाका अनुसार आज दिउँसो देशका पहाडी भूभागमा आंशिकदेखि साधारणतया बदली रही बाँकी भूभागमा मौसम सफादेखि आंशिक बदली रहने छ ।
देशका पहाडी भूभागका केही स्थान र बाँकी भूभागका एक,दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागका एकदुई स्थानमा हल्का वर्षा र हिमपातको सम्भावना छ ।
आज राति गण्डकी, मधेश, कर्णाली र सुदूरपश्चिम प्रदेशलगायत देशका पहाडी भूभागमा आंशिकदेखि साधारणतया बदली रही बाँकी भूभागमा मौसम सफादेखि आंशिक बदली रहने छ ।
मधेश प्रदेशलगायत बाँकी प्रदेशका पहाडी भागका केही स्थान र बाँकी भूभागका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ ।
देशका उच्चपहाडी तथा हिमाली भूभागका एक,दुई स्थानमा हल्का वर्षा र हिमपातको सम्भावना रहेको महाशाखाले जनाएको छ ।
यता, गण्डकी प्रदेशको राजधानी शहर पोखरामा आज पनि वर्षाको सम्भावना छ । आज दिनभर बादल लाग्ने सम्भावना रहेको बताइन्छ । पोखरामा सोमबार साँझ भारी वर्षा भएको थियो ।
पोखराको अहिले बिहानको तापक्रम २३ डिग्री सेल्सियस रहेको र दिउँसो बढेर २९ डिग्री सेल्सियस पुग्ने अनुमान गरिएको छ । पोखरामा आज सापेक्षित आद्रता ९० प्रतिशत रहेको छ ।
