पोखरा । पोखरा महानगरपालिका वडा नं ३ नदीपुरस्थित न्यू ग्यालेक्सी स्कुलले ‘चौथो ग्राण्ड अनलाइन क्वीज कम्पिटिसन’ आयोजना गरेको छ ।
२०८१ मा एसईई दिएर बसेका विद्यार्थीलाई लक्षित गरी कार्यक्रम आयोजना गरिएको विद्यालयले जनाएको छ । प्रतियोगिता यही जेठ ३० गते बिहान ११ बजेदेखि हुने विद्यालयका प्राचार्य डा. रामजी शर्माले जानकारी दिए ।
प्रतियोगितामा सहभागिता हुनका लागि जेठ २९ गते साँझ ५ बजेसम्ममा दर्ता गर्न सकिनेछ ।
प्रतियोगितामा प्रथम हुनेलाई १५ हजार, द्वितीय हुनेलाई आठ हजार र तृतीय हुनेलाई पाँच हजार रुपैयाँ नगद पुरस्कार प्रदान गरिने विद्यालयका सहायक प्राचार्य राजेश भण्डारीले जानकारी दिए । साथै लक्की ड्रमार्फत आकर्षक उपहारसमेत प्रदान गरिने उनले बताए ।
सातौँ एसइई बास्केटवल प्रतियोगिताको तयारी पूरा
यसैबीच न्यू ग्यालेक्सी स्कुलले आयोजना गरेको सातौँ एसइई बास्केटवल प्रतियोगिताको तयारी पूरा भएको छ । प्रतियोगिता यही जेठ २८ र २९ गते विद्यालयमै हुनेछ ।
कास्कीमा २०८१ को एसइई परीक्षा दिएर बसेका विद्यार्थी प्रतियोगितामा सहभागी हुन पाउनेछन् ।
प्रतियोगिताका सबै खेल अन्तर्राष्ट्रिय बास्केटबल महासङ्घको नियम अनुसार लिगकम नकआउटका आधारमा खेलाइने संयोजक क्या. वीरबहादुर गुरुङले जानकारी दिए ।
प्रतियोगितामा सहभागी हुने टिमले छात्रतर्फ नौ जना खेलाडी र टिम प्रशिक्षक तथा छात्रातर्फ पाँच जना खेलाडी र टिम प्रशिक्षक समावेश गर्न पाउनेछ ।
छात्रतर्फ प्रतियोगिता विजेताले २० हजार, उपविजेताले १० हजार तथा छात्रातर्फ विजेताले १० हजार र उपविजेतालाई छ हजार रुपैयाँ नगद पुरस्कार र मेडल, प्रमाणपत्र प्रदान गरिने विद्यालयले जनाएको छ ।
साथै सर्वोत्कृष्ट खेलाडी र सर्वाधिक स्कोर गर्ने खेलाडीलाई मेडल र प्रमाणपत्र प्रदान गरिनेछ ।
टिम दर्ताका लागि यही जेठ २७ गते अर्थात आज दिनको ४ बजेसम्म विद्यालयमा सम्पर्क गर्न सकिने संयोजक गुरुङले जानकारी दिए ।
२०५१ सालमा स्थापित विद्यालयमा हाल एक हजार तीन सय विद्यार्थी अध्ययनरत छन् । जसमा कक्षा ११ र १२ मा मात्रै पाँच सय बढी विद्यार्थी छन् ।
विद्यालयमा कक्षा ११ र १२ मा विज्ञान, कम्प्युटर विज्ञान, व्यवस्थापन, होटल व्यवस्थापन र पर्यटनको पढाई हुँदै आइरहेको छ ।
