पोखरा । राष्ट्रिय लोक तथा दोहोरी गीत प्रतिष्ठान नेपाल गण्डकीले आयोजना गरेको ‘आरके हस्पिटालिटी प्रथम गण्डकी लोक तारा’ का लागि १८ जना छनोट भएका छन् ।
सोमबार पोखरामा पत्रकार सम्मेलन गरेर दिएको जानकारी अनुसार प्रतिष्ठानले गण्डकी प्रदेशका नौ जिल्लामा गरेको अडिशनमार्फत उनीहरु छानिएका हुन् ।
छनोट हुनेमा कास्कीबाट उमेश अधिकारी र सपना विश्वकर्मा, स्याङ्जाबाट दिलिपकुमार मानन्धर र ज्ञानीमाया गुरुङ, पर्वतबाट अप्सन विक र शोभा परियार, बागलुङबाट प्रेम विक र ललिता घर्ती छन् ।
यस्तै, म्याग्दीबाट विजय परियार र गरिमा परियार, तनहुँबाट अन्जना गुरुङ र कमल आले, गोरखाबाट पवनश्री परियार र निश्चल गुरुङ, लमजुङबाट मनबहादुर गुरुङ रञ्जित र युगेश परियार, नवलपुरबाट यजीकल परियार र कोपिला गुरुङ छन् ।
विश्व सङ्गीत दिवस असार ७ गते हुने अन्तिम प्रतिस्पर्धाका लागि उनीहरू छनोट भएको प्रतिष्ठानका अध्यक्ष राजन कार्कीले जानकारी दिए ।
नयाँ कलाकारलाई मञ्च प्रदान गर्दै लुकेर रहेको उनीहरूको प्रतिभा बाहिर ल्याएर अघि बढ्न हौसला प्रदान गर्ने उद्देश्यले पहिलोपटक कार्यक्रम आयोजना गरिएको उनको भनाइ छ ।
प्रतियोगितामा प्रथम हुनले ५१ हजार एक सय ११ रुपैयाँ, द्वितीय हुने ३१ हजार एक सय ११ रुपैयाँ, तृतीय हुनेले २१ हजार एक सय ११ रुपैयाँ र सान्त्वना स्थानले ११ हजार एक सय ११ रुपैयाँ रहेको छ ।
प्रतियोगिताको निर्णायक संयोजकमा राष्ट्रिय लोक तथा दोहोरी गीत प्रतिष्ठान नेपालका पूर्वअध्यक्ष दुर्गा रायमाझी छन् । अन्य निर्णायकमा वरिष्ठ संगीतकार नवराज बराल, प्रतिष्ठान नेपालका पूर्वअध्यक्ष पुरुषोत्तम न्यौपाने, लोक दोहोरी गायक पशुपति शर्मा, गायिका शान्ति गुरुङ छन् ।
