पोखरामा आज सबेरै भएको सवारी दुर्घटनामा दुई युवक गम्भिर घाइते भएका छन् ।
पूर्वान्ह १० बजेसम्म उनीहरूको पहिचान नखुलेको वडा प्रहरी कार्यालय बैदामले जानकारी दिएको छ ।
बिहान ५ः५५ बजेको समयमा पोखरा १७ मुस्ताङचोकमा भएको दुर्घटनामा हालसम्म नाम, थर, वतन नखुलेको अन्दाजी २४/२५ वर्षका दुई पुरुष व्यक्तिहरु घाइते भई उपचारका लागि गण्डकी मेडिकल कलेज पठाइएको कार्यालय प्रमुख डीएसपी नवराज भट्टराईले जानकारी दिए ।
पृथ्वीचोकबाट बिरौटातर्फ जाँदै गरेको ग १ ख ७९२९ नं.को टिप्परमा राष्ट्रबैकचोकबाट मुस्ताङचोक हुँदै बिरौटा तर्फ जादै गरेको प्र.३–०२–०१३ प ५८०४ नं.को माटरसाइकल ठक्कर खाएको थियो ।
घाइते दुवैको टाउकोमा चोट हुनाले अवस्था गम्भिर रहेको र सिटी स्क्यान रिपोर्टको पर्खाईमा रहेको डिएसपी भट्टराईले गण्डकन्यूजसँग बताए ।
वडा प्रहरी कार्यालय बैदामबाट प्रहरी निरीक्षक मुकुन्द सिग्देलको कमाण्डमा ११ जनाको टोली खटिएर दुवै सवारी साधन र टिप्परलाई नियन्त्रणमा लिइएको भट्टराईले जनाए ।
टिप्पर चालक धादिङ रोराङ गाउँपालिका ८ घर भएको बर्ष ४३ को मित्रलाल श्रेष्ठ अहिले प्रहरी नियन्त्रणमा छन् । घुम्तीमा मोटरसाइकल तीव्र गतिमा हुनाले टर्निङ काट्न नसकी टिप्पर मुनी पर्न गएको प्रत्यक्षदर्शीलाई उदृत गर्दै प्रहरीले जनाएको छ ।
