राष्ट्रिय शक्ति नेपालका अध्यक्ष केशरबहादुर विष्टले विश्वेश्वरप्रसाद कोईरालालाई महामानव भन्न नहुने बताउनुभएको छ ।
विपी काँग्रेसले काठमाडौंमा आयोजना गरेको चियापान तथा छलफल कार्यक्रममा बोल्दै उहाँले यस्तो बताउनुभएको हो । उहाँले विपी महामानव नभइ राजनेता भएको तर्क गर्नुभयो । उहाँले महामानव राजनीतिबाट बाहिर रहेको र गल्ती नगर्नेलाई भन्ने गरिने पनि उल्लेख गर्नुभयो । विपी गल्ती र राजनीति नगर्ने मान्छे नभएको बताउनु भयो । विपीले समयानुसार मुलुकको माटो, गहिराईलाई बुझेर अघि बढाउनुभएको र अहिलेसम्म पनि विपी जत्तिको नेपाललाई बुझ्ने मान्छे राजनीतिमा अर्को नदेखेको बताउनु भयो । मनमोहन अधिकारी पनि विपीको नजिकसम्म पुगेको व्यक्ति भएको बताउनु भयो ।
उहाँले भन्नुभयो, ‘विपी महामानव थिएनन् । हामीले बेला बेलामा गलत बुझ्छौँ । विपीलाई महामानव भन्नु हुँदैन । विपी राजनेता हुनुहुन्थ्यो । विपीको राजनेतापन नेपालको लागि इज्जत र सौभाग्यको कुरा हो । हामीले त्यसरी बुझ्दा बढी राम्रो हुन्छ । महामानव भनेको गल्ती नगर्ने मान्छे हुन्छ, राजनीति नगर्ने मान्छे हुन्छ । विपी गल्ती नगर्ने मान्छे पनि होइन, विपी राजनीति नगर्ने मान्छे पनि होइन । विपी राजनेता हुनुहुन्थ्यो । समयानुसार यो मुलुकको माटो, गहिराईलाई बुझेर त्यसलाई लिएर जाने क्रममा त्यति जानेको बुझेको मान्छे आजसम्म नेपालको राजनीतिमा अर्को भएन । केही नजिक नजिक मनमोहन अधिकारी पनि हुनुभयो । नेपालको राजनीतिमा त्यो तहको राजनेता छैन ।’
उहाँले माओवादीसहितका राजनीतिक दलहरुले व्यवस्था बदल्नको लागि प्रयोग गरेको बाटो राष्ट्रघाती रहेको बताउनु भयो ।
