सोर्स-फोर्स र चाकडी नगर्न कास्की १ का सांसद गनेस पौडेलको कडा निर्देशन

पोखरा।
कास्की क्षेत्र नम्बर १ बाट नवनिर्वाचित राष्ट्रिय स्वतन्त्र पार्टीका उम्मेदवार गनेस पौडेलले आफ्नो ५ वर्षे कार्यकालमा आफूले नगर्ने १३ बुँदा सार्वजनिक गर्दै कुनै पनि अनैतिक काममा आफ्नो सहयोग नरहने स्पष्ट पारेका छन् । उनले सामाजिक सञ्जाल फेसबुकमार्फत सार्वजनिक गरेको सो घोषणामा व्यक्तिगत स्वार्थ, नातावाद र नीतिगत भ्रष्टाचारलाई पूर्ण रूपमा निषेध गर्ने उल्लेख गरेका छन् ।

निर्वाचित भएपछि मतदाता र सुभेच्छुकहरूलाई सम्बोधन गर्दै पौडेलले आफ्नो सम्बन्धको आडमा कसैलाई जागिर, नियुक्ति, सरुवा वा बढुवाका लागि सिफारिस नगर्ने बताएका छन् । ‘मलाई पारिवारिक, सामाजिक, राजनीतिक वा मित्रताको सम्बन्धको आड लागेर आफू वा आफन्तलाई जागिर, नियुक्ति, सरुवा वा बढुवा मिलाइदिन नभन्नु होला, म गर्दिनँ’ उनले भनेका छन् । उनले आफ्ना वा आफन्तका छोराछोरीलाई विद्यालय वा क्याम्पसमा छात्रवृत्तिमा भर्ना गराइदिन समेत आग्रह नगर्न अनुरोध गरेका छन् ।

प्रशासनिक र कानुनी प्रक्रियामा हुने राजनीतिक हस्तक्षेपलाई पूर्णतः अस्वीकार गर्ने नीति उनले लिएका छन् । ट्राफिक नियम उल्लंघन गरेपछि कारबाहीबाट बच्न सोर्स–फोर्स नलगाउन चेतावनी दिँदै उनले लागूऔषध ओसारपसार, ठगी, जालसाजी, कुटपिट र चोरी–तस्करी जस्ता कुनै पनि आपराधिक केसमा भनसुन नगर्ने अडान लिएका छन् । उनले यस्ता मुद्दामा कानुनी कारबाहीबाट बचाउन गरिने कुनै पनि आग्रह नमान्ने बताएका छन् ।