पोखरा । कास्की, तनहुँ लगायत राजमार्ग क्षेत्रमा चैत महिनामा ४४ सवारी दुर्घटना हुँदा २४ जनाको मृत्यु भएको छ । नेपाल प्रहरी अन्तर्गत राजमार्ग सुरक्षा तथा ट्राफिक व्यवस्थापन कार्यालय पोखराले सार्वजनिक गरेको विवरण अनुसार दुर्घटनामा ५० जना घाइते भएका छन् भने ५५ सवारी साधन संलग्न छन् ।
कार्यालयका अनुसार मृत्यु हुनेमध्ये १८ पुरुष, ४ महिला र २ बालक छन् । घाइतेमध्ये २७ पुरुष, १५ महिला, ५ बालक र ३ बालिका छन् । घाइतेमध्ये ४० जनाको अवस्था गम्भीर र १० जनाको सामान्य रहेको उल्लेख छ । दुर्घटनापछि प्रहरीले ४४ जनाको उद्धार गरेको जनाएको छ ।दुर्घटनाका कारणमध्ये चालकको असक्षमता, मादक पदार्थ सेवन, तीव्र गति, सवारी साधनको प्राविधिक समस्या, पैदल यात्रुको लापरबाही र सडकको अवस्था मुख्य रहेको कार्यालयले जनाएको छ । हतारमा बाटो काट्नु र जथाभावी हिँड्नुजस्ता कारणले पनि दुर्घटना बढेको देखिएको छ, भन्ने विश्लेषण प्रतिवेदनमा उल्लेख छ ।
ट्राफिक व्यवस्थापनतर्फ चैत महिनाभर ३ हजार ३७६ सवारी साधन जाँच गरिएको छ । पृथ्वी राजमार्ग, सिद्धार्थ राजमार्ग, पश्चिम राजमार्ग, भूपी शेरचन राजमार्ग र कालिगण्डकी करिडोर क्षेत्रमा २३ पटक राजमार्ग गस्ती गरिएको कार्यालयले जनाएको छ । बन्द, चक्काजाम वा हड्ताल नभएको महिनामा दुर्घटना न्यूनीकरणका लागि १ हजार ९२१ पटक ट्राफिक प्रहरी परिचालन गरिएको थियो ।कारबाहीतर्फ १ हजार ३९६ सवारीमाथि कारबाही गरी २८ लाख ६० हजार रुपैयाँ राजस्व संकलन गरिएको छ । सेवाग्राहीका रूपमा विभिन्न कागजपत्र, सिफारिस र मिलापत्रका लागि १३ हजार ७९६ जना कार्यालय पुगेका थिए । हटलाइन तथा ड्युटी नम्बरमा ४ हजार ५९८ कल आएका र सबै सम्बोधन गरिएको जनाइएको छ ।
समुदाय तथा विद्यालय केन्द्रित कार्यक्रमअन्तर्गत ट्राफिक सचेतना कक्षा, चालक तथा सहचालक प्रशिक्षण, स्थानीय समुदायमा जनचेतना कार्यक्रम, माइकिङ तथा सुरक्षित यात्रा सम्बन्धी कार्यक्रम सञ्चालन गरिएको कार्यालयले जनाएको छ । कार्यालयले प्रहरी कर्मचारीको मनोबल वृद्धि गर्न नियमित बैठक, गुनासो सुनुवाइ र टोली कार्यक्रम सञ्चालन गरिएको पनि जनाएको छ ।
