काठमाडौं । गएको चैत महिनामा देशका विभिन्न भागमा भएका ९ सय वटा विपद्का घटनामा परी ३० जनाको मृत्यु भएको छ । आगलागी, हुरी, चट्याङ र हिमपात जस्ता दैवी विपत्तिमा परी १६ पुरुष, १० महिला र ४ जना बालबालिकाले ज्यान गुमाएको प्रहरी प्रधान कार्यालयले जनाएको छ ।
विपद्का यी घटनामा परेर २ सय २२ जना घाइते भएका छन् । भौतिक क्षतितर्फ १९१ घर, ११७ गोठ र ३ वटा सरकारी कार्यालयमा क्षति पुगेको छ भने ५२९ चौपाया मरेका छन् । प्रहरीका अनुसार यी घटनाहरुबाट ३३ करोड ७२ लाख ६१ हजार रुपैयाँ बराबरको धनमाल क्षति भएको अनुमान छ । विपद्का कारण देशभरका १४३ जना मानिस विस्थापित भएका छन् ।
विपद् प्रतिकार्य र उद्धार कार्यका लागि चैत महिनाभर ४ हजार ८४१ प्रहरी परिचालन गरिएको प्रहरी प्रवक्ता अविनारायण काफ्लेले बताए । प्रवक्ता काफ्लेले भने, विपद्को सूचना पाउनासाथ प्रहरी तत्काल कार्यक्षेत्रमा खटिएर उद्धार तथा राहत कार्यमा सक्रिय भएको छ । उनले विपद्का समयमा प्रहरीले धनजनको क्षति न्यूनीकरण गर्न प्रभावकारी भूमिका खेलेको जानकारी दिए ।क्षेत्रगत रुपमा कोशी प्रदेशमा सबैभन्दा धेरै २७२ वटा विपद्का घटना भएका छन् । यसैगरी मधेसमा १३६, लुम्बिनीमा १२९, गण्डकीमा ९५, सुदूरपश्चिममा ९३ र बागमतीमा ८५ वटा घटना भएका छन् । कर्णाली प्रदेशमा ५७ वटा र काठमाडौँ उपत्यकामा ३९ वटा विपद्का घटना भएको तथ्यांक प्रहरीले सार्वजनिक गरेको छ ।
