पोखरा । बैदाम तामाङ सेवा समाजद्वारा आयोजित नवौँ मिस तामाङ पोखराको ग्राण्ड फिनाले आज हुँदैछ । ग्राण्ड फिनालेकाे सबै तयारी पूरा भएकाे छ । प्रतियोगिता पोखरा सभागृह हलमा दिउँसो १२ बजे सुरु हुने आयोजक संस्थाका अध्यक्ष ज्याक तामाङले बताए । ग्राण्ड फिनालेमा विशाल काल्तानलगायतका कलाकारको प्रस्तुति रहनेछ ।
प्रतियोगितामा ११ तामाङ समुदायका युवतीको सहभागिता छ । सहभागीमा आकृति तामाङ, मञ्जिता पाख्रिन, प्रिन्सेस घिसिङ तामाङ, पूर्णिमा थिङ तामाङ, सुनिता तामाङ, सिसा लामा, सुप्रिया गोले तामाङ, पूर्णिमा लामा, सुमिना तामाङ, जमुना लामा र सोनिका तामाङ छन् ।
प्रतियोगिताको प्रमुख निर्णायकमा चलचित्र निर्देशक तथा नेपाल चलचित्र विकास बोर्डका अध्यक्ष दिनेश डिसी, मिस नेपाल २००९ जेनिशा मोक्तान र गीतकार तीर्थ तामाङ रहने छन्।
कार्यक्रम संयोजक रोश्मा ब्लोन तामाङले विजेताले ताज, ट्रफी, प्रमाणपत्रसहित एक लाख नगद तथा आकर्षक गिफ्ट ह्याम्पर पाउने बताइन् ।
फस्ट रनरअपले ताज, ट्रफी, प्रमाणपत्रसहित नगद ५० हजार र सेकेन्ड रनरअपले ताज, ट्रफी, प्रमाणपत्रसहित नगद ३० हजार रुपैयाँ हात पार्ने छन् । भ्यूवर्स च्वाइसका रुपमा एक जनाले नगद २० हजार पुरस्कारसमेत प्राप्त गर्ने छन् ।
बैदाम तामाङ सेवा समाज कास्कीले हरेक वर्ष ल्होसारको अवसरमा मिस तामाङ पोखरा तथा ल्होसार म्युजिकल फेस्टिभल गर्दै आएको छ ।
