पोखरा । स्याङ्जामा आज बिहान स्कार्पिओ गाडी दुर्घटना हुँदा पाँच जना घाइते भएका छन् ।
वालिङ नगरपालिका वडा नं १४ तमादीको वालिङ-पर्वत कच्ची सडक खण्डमा ग१च ८९१३ नम्बरको स्कार्पियो गाडी दुर्घटना भएको प्रहरीले जनाएको छ ।
दुर्घटनामा घाइते हुनेमा स्याङ्जा वालिङ-१४ का ६३ वर्षीय उमापति डुम्रे, सोही ठाउँका ५२ वर्षीय भीमप्रसाद डुम्रे, ७८ वर्षीय कोषकान्त डुम्रे, पर्वतको पैयुँ गाउँपालिका-६ हुवासकी ३३ वर्षीया कुमाकला तिवारी र उनका छोरा ११ वर्षीय कमल तिवारी छन् ।
घाइतेको प्राथमिक स्वास्थ्य केन्द्र वालिङमा उपचार भइरहेको जिल्ला प्रहरी कार्यालय स्याङ्जाका प्रहरी नायव उपरीक्षक (डीएसपी) हरिप्रसाद पौडेलले जानकारी दिए । दुर्घटनाको कारण खुलिनसकेको प्रहरीले जनाएको छ ।
