पोखरा । पोखरा महानगरपालिका वडा नं १६ स्थित महेन्द्र गुफा चमेरे गुफा पर्यटकीय विकास समितिको संयोजकमा महेन्द्र खड्का चयन भएका छन् ।
बाटुलेचौरस्थित विन्ध्यवासिनी माविको संरक्षण, व्यवस्थापन एवं स्वामित्वमा सञ्चालित महेन्द्र तथा चमेरे गुफाको बृहत्तर विकास गर्ने हेतुले विद्यालयको मातहतमा रहने गरी गठित समितिमा खड्कालाई संयोजक चयन गरिएको हो ।
समिति सदस्यमा भरतबहादुर बस्नेत, प्रेम तिमिल्सिना, ओममाया नेपाली, एकराज नेपाली, विनोद पौडेल, मनकला नेपाली, विजय सापकोटा, पदेन सदस्यमा पूर्वसंयोजक गुरुदत्त भट्टराई, गुफा क्षेत्र संरक्षण तथा सामुदायिक विकास संस्था र सदस्य सचिवमा शिशिर पौडेल छन् ।
समिति सल्लाहकारमा पूर्वसंयोजक सुवासबाबु अधिकारी, गोविन्दबहादुर बस्नेत, यदुनाथ बञ्जरा, समाजसेवी पुष्पराज अधिकारी, केशव बहादुर बस्नेत र प्राविधिक सल्लाहकारमा ईन्जिनियर भुवनबहादुर थापा छन् ।
समिति संयोजक खड्कालाई बिहीबार महेन्द्र गुफा चमेरे गुफा सचिवालयमा स्वागतसमेत गरिएको छ ।
संयोजक खड्का र विन्ध्यवासिनी माविका अध्यक्ष सन्दीप थापालाई समितिका सल्लाहकार पुष्पराज अधिकारीले खादा लगाएर सम्मानसहित स्वागत गरे ।
कार्यक्रममा संयोजक खड्काले सबै पक्षको सहकार्यबाट गुफा क्षेत्रको वृहतर विकासमा समिति क्रियाशील रहने बताए ।
उनले गुफाका कारण यस क्षेत्रको शैक्षिक, भौतिक र पर्यटकीय विकासमा ठूलो सहयोग पुगेको भन्दै यसको थप सौन्दर्यकरणमा ध्यान केन्द्रित गर्ने स्पष्ट पारे ।
विद्यालय व्यवस्थापन समिति अध्यक्ष थापाले गुफा जोगाउन र यसको संरक्षण गर्न सकेमात्र यहाँको विकास र पर्यटकीय सम्भावना बढ्ने बताए ।
साथै गुफाको विकासमा कुनै कसर बाँकी नराख्ने बताए । सहभागी सदस्य एवं सल्लाहकारले विद्यालयसँग समवन्य गर्दै अघि बढ्दा विद्यालय र गुफा क्षेत्र दुवैको हित हुनेमा जोड दिए ।
समितिले दुवै गुफाको प्रचार-प्रसारका लागि आवश्यक तयारी गर्न सदस्य एकराज नेपालीलाई जिम्मा दिने निर्णयसमेत गरेको छ ।
सो अवसरमा समितिले परिचयका आधारमा पोखरा-१६ का वासिन्दालाई निःशुल्क प्रवेशको व्यवस्था गर्ने जनाएको छ ।
समितिले आन्तरिक कार्यलाई व्यवस्थित गर्दै थप पर्यटकमैत्री वातावरण निर्माण गर्न आवश्यक योजना निर्माण गर्ने तयारी गरेको जनाइएको छ।
