पोखरा । पोखरा महानगरपालिका वडा नं १२ का वडाध्यक्ष वडाध्यक्ष सन्तोष बास्तोलाले विश्व उच्च स्तरीय प्रविधिमा पुगिसक्दा पनि नेपालको शिक्षा प्रणालीमा अझै प्रविधिको पहुँच पुग्न नसकेको बताएका छन् ।
पोखरा-१२ स्थित हिलप्वाइन्ट माविद्वारा वार्षिकोत्सवको अवसरमा आयोजित फुड फेस्टिभल, चित्रकला प्रदर्शन र पुरस्कार वितरण कार्यक्रम उद्घाटन गर्दै उनले यस्तो बताएका हुन् ।
‘अझै पनि विद्यार्थी र अभिभावकले शिक्षकलाई र शिक्षकले प्रणालीलाई द्वोष दिने गरिएको छ’, उनले भने, ‘यस्तो अवस्थाले नेपालको शिक्षा प्रणाली कहाँ छ भन्ने स्पष्ट हुन्छ ।’
गुणस्तरीय र संस्कारयुक्त शिक्षाका लागि पटकपटक छलफल गरिएको भन्दै उनले वडाभित्रका सबै विद्यालयमा संस्कारयुक्त शिक्षा लागू गर्ने प्रयास भइरहेको बताए । विद्यालयले शिक्षामात्र होइन संस्कारयुक्त र व्यवहारिक शिक्षा दिन आवश्यक रहेको वडाध्यक्ष बास्तोलाले बताए ।
विद्यालयका अभिभावक एवं समाजसेवी ऋषिराम लामिछानेले हिलप्वाइन्टले शैक्षिक क्षेत्रमा खेलको भूमिका निकै महत्वपूर्ण र उत्कृष्ट रहेको बताए । उनले विद्यार्थीलाई सही बाटोमा हिंडाउन विद्यालयमात्र होइन अभिभावको भूमिका पनि महत्वपूर्ण हुने स्पष्ट पारे ।
विद्यालय विद्यार्थी, शिक्षक र अभिभावकको त्रिवेणी भएको भन्दै उनले यी त्रिवेणीको सहकार्यले मात्र गुणस्तरीय शिक्षा हासिल हुने दावी गरे । बालबालिकाको क्षमता अद्भूत हुने भन्दै उनले उनीहरुका क्षमतालाई अभिभावकले राम्रोसँग बुझ्नुपर्नेमा जोड दिए ।
सहायक प्राचार्य गंगाराम पौडेलले विद्यालयको गतिविधिमाथि प्रकाश पार्दै विद्यालय, शिक्षक, विद्यार्थी र अभिभावक बीचको सम्बन्ध सुमधुर हुनुपर्नेमा जोड दिए ।
कार्यक्रममा कक्षा ११ र १२ मा होटल व्यवस्थापनमा अध्ययनरत विद्यार्थीले विभिन्न १५ प्रकारका खानाका परिकार, फाइन आर्टमा अध्ययनरत विद्यार्थीले विभिन्न चित्रकला प्रस्तुत गरेका थिए ।
उक्त अवसरमा शिक्षिका संगीता भुषाललाई वेष्ट टिचर्स अवार्ड, उत्कष्ट शिक्षकशिक्षिका केशव घिमिरे, सरस्वती कार्की र जुनी गुरुङलाई सम्मान गरिएको थियो ।
यसैगरी कक्षा १२ मा फइनआर्टमा अध्ययनरत एलिश दूतराज र जेसिस गुरुङलाई नगदसहित चियरमेन अवार्ड प्रदान तथा वार्षिक परीक्षा, विभिन्न अतिरिक्त क्रियाकलापमा उत्कृष्ट विद्यार्थीलाई पुरस्कृत गरिएको थियो ।
कार्यक्रममा विद्यार्थीले गीत, नृत्यलगायतका मनोरन्जनात्मक प्रस्तुति प्रस्तुत, एलकेजीका पाँच वर्षीय बालक अभियान श्रेष्ठले हनुमान चालिसा पाठ गरेका थिए ।
विद्यालय व्यवस्थान समिति अध्यक्ष बिजुलीबहादुर गुरुङको अध्यक्षतामा भएको कार्यक्रममा कक्षा १० की रीस्ता गुरुङले स्वागत र शिक्षिका भावना लामिछाने, जुनी गुरुङ र संगीता भुषालले सञ्चालन गरेका थिए ।
विद्यालयले केही दिन अघिमात्रै अभिभावकका लागि ‘माइ सेकेण्ड टिचर एप’ सार्वजनिक तथा दन्त शिविर आयोजना गरेको थियो ।
२०३८ सालमा स्थापित विद्यालयमा हाल आठ सय विद्यार्थी अध्ययनरत छन् । विद्यालयमा कक्षा १२ मा विज्ञान, व्यवस्थापन, होटल व्यवस्थापन र फाइन आर्टको पढाई हुँदै आएको छ ।
तस्बिर
