पोखरा । नेकपा माओवादी केन्द्र गण्डकी प्रदेश अध्यक्ष गायत्री गुरुङ कुशमले जनयुद्धले नै देशको राजनीतिक कोर्ष परिवर्तन गरेको बताएकी छन् ।
‘जनयुद्ध’ शब्द केही सुन्नै नचाहे पनि जनयुद्धले नै मुलुक अहिलेको अवस्थामा आइपुगेको उनले बताइन् ।
नेकपा माओवादी केन्द्र धादिङ-पोखरा जनसम्पर्क मञ्चद्वारा पहिलो पटक आयोजित खुला रक्तदान कार्यक्रम उद्घाटन गर्दै उनले यस्तो बताएकी हुन् ।
उनले भनिन्, ‘केही तत्वलाई माओवादीको आन्दोलन नै मन परेको छैन, जनयुद्ध सुन्नेवित्तिकै तर्सिन्छन् ।’
माओवादीले गरेका राम्रा कामलाई सबैले साथ दिनुपर्ने भन्दै उनले पोखरामा धादिङवासीलाई एक्लो महसुस हुन नदिने प्रतिवद्धता जनाइन् ।
अध्यक्ष गुरुङले पहिलो रक्तदाता दिनेश तुलाधरलाई ब्लडव्याग हस्तान्तरण गरेर कार्यक्रम उद्घाटन गरेकी थिइन् । कार्यक्रममा ७० युनिट रगत संकलन भएको थियो ।
कार्यक्रममा मञ्चका सल्लाहकार बलराम खतिवडा, अखिल नेपाल ट्रेड युनियन महासंघ कास्की अध्यक्ष अर्जुन पौडेल, माओवादी केन्द्र पोखरा-४ का अध्यक्ष लाेकनाथ भण्डारीलगायतले मुलुक परिवर्तनमा जनयुद्धले खेलेको भूमिकाको चर्चा गरेका थिए ।
मञ्चका अध्यक्ष कृष्ण धरेलेको अध्यक्षतामा भएको कार्यक्रममा स्वागत रामप्रसाद पाण्डे राजुले र सञ्चालन सचिव गोकर्ण लम्सालले गरेका थिए ।
कार्यक्रममा प्राविधिक सहयोग प्रादेशिक रक्तसञ्चार केन्द्र पोखराले गरेको थियो । कार्यक्रम संयोजक उपाध्यक्ष लुमणिप्रसाद अगस्ती रहेका थिए ।
