पोखरा । राष्ट्रिय तथा अन्तर्राष्ट्रिय पिसरन टोली शुक्रबार पोखरा महानगरपालिका वडा नं १६ लामाचौरस्थित अल्फा बोर्डिङ स्कुलमा पुग्यो ।
शनिबार पोखरामा हुने १९औँ सफल पोखरा अन्तर्राष्ट्रिय म्याराथन सहभागी हुन पोखरा आइपुगेको पिसरन टाेली शुक्रबार ११ बजे अल्फा पुगेको थियो ।
पिस र्यालीसहित लामाचौर चोक हुँदै विद्यालय प्रवेश गरेको टोलीलाई विद्यालयले भव्य स्वागत गर्याे ।
समाज तथा विद्यालयमा शान्ति फैलाउने उद्देश्यका साथ टोलीले विभिन्न सन्देशमूलक कार्यक्रमसहित करिब डेढ घण्टा बितायो ।
सो अवसरमा विद्यालयका तर्फबाट स्वागत नृत्य, विभिन्न खेल तथा सन्देशमूलक प्रस्तुति प्रस्तुत गरिएको थियो। पिसरन टोलीले विद्यालयलाई मायाको चिनो प्रदानसमेत गरेको थियो ।
कार्यक्रममा पिसरन टोलीको राष्ट्रिय संयोजक श्वेता प्रधानले शान्तिको शाान्तिका लागि दौडमार्फत अन्तर्राष्ट्रिय समुदायमा शाान्ति र भातृत्वको कामनासहित सम्पूर्ण विश्व नै एउटा सिंगो परिवार भएको सन्देश दिन खोजिएको बताइन् ।
सो अवसरमा विद्यालयका प्राचार्य सुरेन्द्र मानसिंह भण्डारीले यस्ता सामाजिक विषयवस्तु जोडिएका कार्यक्रम आगामी दिनमा पनि गर्दै जाने बताए ।
विद्यालयका सहप्राचार्य कृष्ण लम्सालका अनुसार टोलीमा अमेरिका, अष्ट्रेलिया, जापान, चीन, लाटविया, जर्मनीलगायत १४ मुलुकका प्रतिनिधि थिए ।
पिसरन टोलीको स्वागतमा नवआदर्श सामुदायिक विकास संस्थाका अध्यक्ष दिनेश भण्डारी, कोपिला आमा समूह अध्यक्ष शान्ति अधिकारी, स्थानीय सुरक्षा निकायका प्रतिनिधि तथा स्थानीय विभिन्न संघसंस्थाका प्रतिनिधि सहभागी थिए ।
चिन्मोई फाउण्डेसनले प्रत्येक दुई-दुई वर्षमा यस प्रकारकाे कार्यक्रम गर्दै आएकाे छ । सन् १९८७ मा स्थापित अन्तर्राष्ट्रिय फाउण्डेसनले हालसम्म एक सय ६० बढी मुलुकमा शान्ति टर्च प्रदर्शन गरेको बताइन्छ ।
तस्बिरहरु
