पोखरा । हाल देशमा पश्चिमी वायुको सामान्य प्रभाव रहेको छ । जसको आज गण्डकी, कोशी, बागमती, कर्णाली र सुदूरपश्चिम प्रदेशको उच्च पहाडी तथा हिमाली भूभागका थोरै स्थानमा हल्का हिमपातको सम्भावना छ ।
गण्डकी, कोशी, बागमती र कर्णाली प्रदेशका पहाडी भूभागमा आंशिक बदली रहे पनि बाँकी भूभागमा मौसम मुख्यतया सफा रहेको मौसम पूर्वानुमान महाशाखाले जनाएको छ ।
आज तराईका केही भूभागमा हुस्सु र कुहिरो लाग्ने हुनाले यसको प्रभावले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने हुँदा त्यसबाट पर्न सक्ने असरबाट सुरक्षित रहन आवश्यक पर्ने उपाय तथा सतर्कता अपनाउन महाशाखाले अनुरोध गरेको छ ।
आज पोखरामा आंशिक बादल लाग्ने बताइन्छ । आज बिहान ९ बजेको पोखराको तापक्रम १४ डिग्री सेल्सियस छ भने अधिकतम् २० डिग्री पुग्ने अनुमान गरिएको छ । पोखराको सापेक्षित आद्रता ६८ प्रतिशत रहेको छ भने वर्षाको सम्भावना नभएको बताइन्छ ।
