पोखरा । लागोले जलेर घाइते भएका पोखराका मेयर धनराज आचार्य र उपप्रधान तथा अर्थमन्त्री विष्णुप्रसाद पौडेललाई थप उपचारका लागि काठमाडौँ लगिएको छ ।
घटनालगत्तै मेयर आचार्यलाई उपचारका लागि फिस्टेल अस्पताल र अर्थमन्त्री पौडेललाई गण्डकी मेडिकल कलेज पुर्याइएको थियाे । दुवैको दुवै अस्पतालमा सामान्य उपचारपछि थप उपचारका लागि काठमाडौं रेफर गरिएको हो । त्यसपछि उनीहरुलाई सिम्रिक एयरलाइन्सको हेलिकोप्टरबाट काठमाडौं लगिएको हो । उनीहरुको उपचार काठमाडौँ कीर्तिपुरस्थित वर्न अस्पतालमा हुनेछ ।
पोखरा भ्रमण वर्ष २०२५ उद्घाटनका क्रममा शनिबार बेलुन फुटेर आगो लाग्दा मेयर आचार्य र अर्थमन्त्री पौडेल घाइते भएका थिए । आगोले मेयर आचार्यको देब्रेतर्फको गाला पूरै जलेको छ । उनको कपालसमेत डढेको छ ।
रिमोटबाट दीप प्रज्वलनपछि बेलुन उडाउने क्रममा अचानक आगो लागेको थियो । बेलेनमा आगोको आगोको लप्को मेयर आचार्यको अनुहारतर्फ गएको थियो ।
हाइड्रोजन ग्यास भरिएका बेलुनहरू फायर क्यान्डिलबाट निस्किएका झिल्कासँग ठोकिन पुगेपछि दुर्घटना भएको हो ।
आगोको हुर्को झ्याप्पै अनुहार तिर आएपछि मन्त्री पौडेल मञ्चतिर र मेयर आचार्य मञ्चको तलतिर हामफालेका थिए ।
आगोको झिल्कोले टिप्दा बेलुन ठूलो आवाजसहित पड्किएको थियो । सोक्रममा अर्थमन्त्री पौडेल सामान्य घाइते भएका छन् ।
आन्तरिक तथा बाह्य गरी २० लाख पर्यटक भित्र्याउने लक्ष्यका साथ भ्रमण वर्ष घोषणा गरिएको हो । घटनापछि केहीबेर स्थगित भएको कार्यक्रम पुनः शुरु भएर अहिले चलिरहेको छ ।
