पोखरा । सरकारका उपप्रधानमन्त्री एवं अर्थमन्त्री विष्णुप्रसाद पौडेल र पोखरा महानगरपालिका प्रमुख धनराज आचार्यको काठमाडौस्थित कीर्तिपुर अस्पतालमा सघन उपचार कक्ष (आइसीयू) मा भर्ना गरी उपचार शुरु गरिएको छ ।
अस्पतालका निर्देशक डा किरण किशोर नकर्मीद्वारा जारी सूचना अनुसार पौडेल र आचार्यको शरीर ५, ६ प्रतिशत चलेको, अनुहार जलेका कारण स्वासनली र फोक्सोमा समेत असर परेको हुन सक्ने भएकाले उच्च निगरानीमा राखेर उपचार शुरु गरिएको हो ।
उनीहरुको उपचारमा प्राडा डीबी झा, डा. प्रवीण गिरीसहितको टोली, प्राडा शंकरमान राई, डा. विशाल कार्की, डा. मनिष यादल लगायतको जलन विशेषज्ञहरुको टोली, डा. प्रयुश अर्याललगायतका आकस्मिक टोली तथा रीना गौचन, निर्मला कुँवर, तृष्णा महर्जनलगायतको नर्सिङ टोली खटिएका छन् ।
पोखरा भ्रमण वर्ष २०२५ उद्घाटनका क्रममा बेलुन फुटेर आगो लाग्दा मेयर आचार्य र अर्थमन्त्री पौडेल घाइते भएका थिए । लागोले जलेर घाइते भएका मेयर आचार्य र अर्थमन्त्री पौडेललाई थप उपचारका लागि काठमाडौँ लगिएको थियो ।
घटनालगत्तै मेयर आचार्यलाई उपचारका लागि फिस्टेल अस्पताल र अर्थमन्त्री पौडेललाई गण्डकी मेडिकल कलेज पु¥याइएको थियो । दुवैको दुवै अस्पतालमा सामान्य उपचारपछि थप उपचारका लागि काठमाडौं रेफर गरिएको हो ।
त्यसपछि उनीहरुलाई सिम्रिक एयरलाइन्सको हेलिकोप्टरबाट काठमाडौं लगिएको हो । उनीहरुको उपचार काठमाडौँ कीर्तिपुरस्थित वर्न अस्पतालमा हुनेछ । आगोले मेयर आचार्यको देब्रेतर्फको गाला पूरै जलेको छ । उनको कपालसमेत डढेको छ ।
रिमोटबाट दीप प्रज्वलनपछि बेलुन उडाउने क्रममा अचानक आगो लागेको थियो । बेलेनमा आगोको आगोको लप्को मेयर आचार्यको अनुहारतर्फ गएको थियो ।
हाइड्रोजन ग्यास भरिएका बेलुनहरू फायर क्यान्डिलबाट निस्किएका झिल्कासँग ठोकिन पुगेपछि दुर्घटना भएको हो । आगोको हुर्को झ्याप्पै अनुहार तिर आएपछि मन्त्री पौडेल मञ्चतिर र मेयर आचार्य मञ्चको तलतिर हामफालेका थिए ।
आगोको झिल्कोले टिप्दा बेलुन ठूलो आवाजसहित पड्किएको थियो । सोक्रममा अर्थमन्त्री पौडेल सामान्य घाइते भएका छन् । आन्तरिक तथा बाह्य गरी २० लाख पर्यटक भित्र्याउने लक्ष्यका साथ भ्रमण वर्ष घोषणा गरिएको हो ।
