पोखरा । भारतको नयाँदिल्लीले विधानसभा निर्वाचन परिणामको ११ दिनपछि नयाँ मुख्यमन्त्री पाएको छ । बुधबार राति विधायक दलको बैठक बसेर मुख्यमन्त्रीको नाम सार्वजनिक गरिएको भारतीय जनता पार्टी (भाजपा) ले जनाएको छ । मुख्यमन्त्री रेखा गुप्ता बन्ने भएकी छिन् । भाजपा र एनडीएको २१ राज्यमा सरकार छ । रेखा एकमात्र महिला मुख्यमन्त्री हुनेछिन् ।
भाजपाबाट दिल्लीमा चार जना महिला विधायक भएकामा एक जना मुख्यमन्त्री बन्ने भएकी हुन् । उनी दिल्ली भाजपाकी महासचिव तथा महिला मोर्चाकी उपाध्यक्षसमेत हुन् ।
उनी यसअघि दक्षिण दिल्ली नगर निगमकी मेयर भैसकेकी थिइन् । पहिलो पटक विधायक बनेकी उनले पहिलो पटकमै मुख्यमन्त्रीमा बाजी मारेकी हुन् ।
दिल्लीमा यसअघि तीन महिला मुख्यमन्त्री भएका छन् । यसअघि सुषमा स्वारज ५२ दिन, शीला दीक्षित १५ वर्ष २५ दिनर आतिशी ४ महिना १८ दिन भएकी हुन् ।
शपथ ग्रहण कार्यक्रम भने बिहीबार दिउँसो १२ः३५ बजे हुने भएको छ । बिहीबारको शपथका लागि ३० हजार अतिथि सामेल हुनेसमेत सम्भावना बताइएको छ ।
दिल्लीको रामलीला मैदानमा शपथको तयारी भइरहेको छ । समारोहमा प्रधानमन्त्री नरेन्द्र मोदी, केन्द्रीय मन्त्रीहरु, भाजपा र एनडएि शासित राज्यका मुख्यमन्त्री, उपमुख्यमन्त्री सहभागी हुनेछन् । यसका साथै उद्योगपति, चलचित्रकर्मी, क्रिकेट खेलाडी, साधुसन्त लगायत पनि सहभागी हुनेछन् ।
भारतको दिल्लीमा भारतीय जनता पार्टी भाजपाको सरकार बन्दैछ । विधान सभाको निर्वाचनमा भाजपाले स्पष्ट बहुमतसहित सरकार बनाउने भएको हो । ७० सिटका लागि भएको मतदानमा भाजपाले स्पष्ट बहुमत पाएको हो ।
यसअघि लगातार तीन पटक सत्ता चलाएको आम आदमी पार्टी आजपा कम सिटमा खुम्चिएपछि भाजपाले बाजी मारेको हो । भाजपाले ४८ सिट जितेको हो । दोस्रो स्थानमा खुम्चेको आजपा २२ सिटमा खुम्चेको छ ।
