पोखरा । नेकपा एमालेका महासचिव शंकर पोखरेलले गत स्थानीय तहको निर्वाचनअन्तर्गत पोखरामा भएको हारबाट पाठ सिकेर एकढिक्का हुन कास्कीका नेता र कार्यकर्तालाई निर्देशन दिएका छन् ।
वडा केन्द्रित अभियानको सन्दर्भमा पार्टी कास्की जिल्ला कमिटीले पोखरामा आयोजना गरेको अभिमुखीकरण कार्यक्रममा उनले यस्तो निर्देशन दिएका हुन् ।
पार्टी राजनीतिका आन्तरिक असन्तुष्टि आफैभित्र नियन्त्रण गरिनुपर्ने भन्दै उनले एकजुट नहुँदा महानगरको मेयर हार्नुपर्ने परिस्थिति बनेको उनले स्मरण गरे ।
उनले भने, ‘नेता कार्यकर्ताका मन जोडिएको र एकताबद्ध भएको भए निर्वाचनमा मेयर हार्ने, उपमेयर जित्ने हुँदैनथ्यो होला, हाम्रा मन जोडिएको भए वडामा सदस्य जित्ने, अध्यक्ष हार्ने हुँदैनथ्यो होला ।
उनले थपे, ‘नगरसभामा हामी बहुमतमा छौँ, कार्यपालिकामा हामी अल्पमतमा छौँ र आज कार्यपालिकाले हामीलाई नियन्त्रण गरिराखेको छ ।’
प्राविधिक कर्मचारी, स्वास्थ्यका कर्मचारी निकाल्ने काम भएको र पोखरामा काम हुन नसकेको भन्दै उनले हारबाट पाठ सिक्नुपर्ने बताए । उनले अनेक समस्याबीच प्रदेश र प्रतिनिधिसभा निर्वाचनमा कास्कीले राम्रो नतिजा दिएको बताए ।
‘स्थानीय चुनावमा भाँचिएका मनलाई आम चुनावमा एकताबद्ध बनाउने कोसिस गर्नुभयो, कति भयो थाहा छैन तर परिणामका हिसाबले राम्रै दियो भन्ने लाग्छ,’ उनले भने, ‘तर, पनि सबैका मन खुलस्त हुन सकेका छैनन् ।’
पार्टीभित्र एकताबद्ध नभए मिसन ०८४ को उद्देश्य पूरा हुन नसक्ने महासचिव पोखरेलले बताए । सरकार सञ्चालनमा सहकार्य भए पनि आगामी निर्वाचनमा अलग-अलग लड्ने उनले बताए ।
आगामी चुनाव एक्लै लड्ने विषय बुझेर तयारीमा जुट्न कास्कीका नेता-कार्यकर्तालाई महासचिव पोखरेलले निर्देशन दिए ।
तथ्यभन्दा बाहिर गएर राजनीतिक दल र नेतालाई गाली गर्ने गलत काम भइरहेको उनले बताए । उनले देशको समस्या अस्थिर सरकार भए पनि तथ्य बाहिर गएर प्रचारबाजी भएको बताए । एउटै दलले बहुमत नपाउनु, साना दल धेरै हुनु, समीकरण फेरिइरहनु अस्थिर सरकारको कारण भएकोतर्फ महासचिव पोखरेलले इंगित गरे ।
छिमेकी देश चीन र भारतमा स्थिर सरकार हुँदा विकासमा फड्को मारेको र नेपालको प्रमुख समस्या अस्थिरता रहेको महासचिव पोखरेलले जिकिर गर्दै चीनमा सि जिनपिङ र भारतमा नरेन्द्र मोदीले लगातार सरकारको नेतृत्व गरेको प्रसंग सुनाए ।
महासचिव पोखरेलले भने, ‘यही सन्दर्भमा नेपालमा के भइरहेको छ तपाईं हामी सबैलाई थाहा छ, प्रधानमन्त्री फेरिइरहने, समीकरण फेरिइरहने, मन्त्री फेरिइरहने, प्रदेशमा मुख्यमन्त्री फेरिइरहने भएको छ, देश किन बनेन भन्नेमा यो यथार्थबाट बाहिर गएर अनेक प्रकारका विवेचना गर्ने, नेताहरू काम लाग्दैनन्, पार्टीहरू काम लाग्दैनन् भन्ने जुन प्रकारको भाष्य निर्माण गर्न खोजिएको छ यसलाई तत्यसंगत विवेचना गरेर बुझ्नु-बुझाउनु पर्छ ।’
माओवादीको सशस्त्र युद्धका कारण देशमा १० वर्षसम्म काम हुन नपाएको महासचिव पोखरेलको टिप्पणी थियो । गणतन्त्र स्थापना भएपछिको समयपछि काम गर्ने समयका रूपमा लिन सकिने उनको भनाइ थियो ।
‘यो समय पनि कस्तो समय रह्यो भनेर विवेचना गर्ने हो, छलफल गर्ने हो भने ठूला दलमाथि साना दलले शासन गर्ने समय बन्यो,’ उनले भने, ‘वास्तविक जनादेशको सरकार भनेको २०७४ देखि तीन वर्षको हो जुन केपी शर्मा ओलीले नेतृत्व गर्नुभयो ।’
वर्तमान समीकरणमा नेकपा (एमाले) इमान्दारिता साथ अघि बढेको महासचिव पोखरेलले सुनाए । सरकार र संसदलाई चलायमान बनाएर काम गरिरहेको महासचिव पोखरेलले जानकारी गराए ।
‘अहिले छ वटा अध्यादेश ल्याएका छौं त्यो त्यसैको परिणाम हो, संसदमा विचाराधीन विधेयकलाई तीव्रताका साथ लैजान खोजेका छौँ, समितिको परिणाम हो, दुई पार्टी नमिलेको भए यी काम गर्न सम्भव थिएन,’ उनले भने ।
