पोखरा । हाल देशमा पश्चिमी न्यून चापीय प्रणालीको प्रभाव रहेको छ । जसको प्रभावले गण्डकी प्रदेशको राजधानी पोखरामा आज बिहानैदेखि हल्का वर्षा भइरहेको छ ।
पोखराको आकाशमा आज दिनभर बादलिने र वर्षा हुने सम्भाना रहेको बताइन्छ । पोखरामा आज बिहान ८ बजेको तापक्रम १५ डिग्री सेल्सियस रहेको छ भने आज अधिकतम् १८ डिग्री पुग्ने अनुमान गरिएको छ । आज पोखराको सापेक्षित आद्रता ७८ प्रतिशत र वर्षाको सम्भावना पाँच प्रतिशत छ ।
मौसम पूर्वानुमान महाशाखाका अनुसार हाल गण्डकी, सुदूरपश्चिम, कर्णाली र लुम्बिनी प्रदेशमा अधिकांश बदली रहेको छ । सुदूरपश्चिम र कर्णाली प्रदेशमा चट्याङसहित हल्का वर्षा भइरहेको छ ।
आज दिउँसो गण्डकी, सुदूरपश्चिम, कर्णाली र लुम्बिनी प्रदेशमा अधिकांश बदली रही बाँकी भूभागमा आंशिकदेखि साधरणतया बदली रहनेछ ।
कर्णाली प्रदेशका साथै सुदूरपश्चिम प्रदेशका पहाडी भूभागका धेरै स्थानमा चट्याङसहित हल्कादेखि मध्यम वर्षा, गण्डकी र लुम्बिनी प्रदेशका साथै देशका बाँकी पहाडी भूभागका थोरै स्थानमा चट्याङसहित हल्का वर्षाको सम्भावना छ ।
साथै सुदूरपश्चिम र कर्णाली प्रदेशका उच्च पहाडी तथा हिमाली भूभागका धेरै स्थान, गण्डकी प्रदेशका उच्च पहाडी तथा हिमाली भूभागका केही स्थान र बाँकी प्रदेशका उच्च पहाडी तथा हिमाली भूभागका थोरै स्थानमा हल्कादेखि मध्यम हिमपातको सम्भावना छ ।
आज राति गण्डकी, सुदूरपश्चिम र कर्णाली प्रदेशका केही स्थानमा चट्याङसहित हल्कादेखि मध्यम वर्षाका साथै देशका बाँकी पहाडी भूभागका थोरै स्थानमा चट्याङसहित हल्का वर्षाको सम्भावना छ ।
सुदूरपश्चिम प्रदेश र कर्णाली प्रदेशका उच्च पहाडी तथा हिमाली भूभागका केही स्थान, गण्डकी प्रदेशका उच्च पहाडी तथा हिमाली भूभागका थोरै स्थानमा र बाँकी प्रदेशका उच्च पहाडी तथा हिमाली भूभागका एक-दुई स्थानमा हल्कादेखि मध्यम हिमपातको सम्भावना छ ।
महाशाखाले गण्डकी, कर्णाली, सुदूरपश्चिम र लुम्बिनी प्रदेशका साथै देशका बाँकी पहाडी भूभागमा चट्याङसहित वर्षा तथा हिमपातको सम्भावना रहेकोले विशेष सतर्कता अपनाउन अनुरोध गरेको छ ।
