पोखरा । पोखरामा प्रथम पोखरा कप पुरूष राष्ट्रिय ह्याण्डबल प्रतियोगिता हुने भएको छ ।
गण्डकी प्रदेश ह्याण्डबल संघको आयोजनामा तथा प्रदेश खेलकुद परिषद् गण्डकीको सहकार्यमा आगामी चैत ३ देखि ५ गतेसम्म प्रतियोगिता सञ्चालन हुनेछ ।
संघका अध्यक्ष केशव पाठकका अनुसार प्रतियोगिताका लागि सात वटै प्रदेश र विभागीय टिमलाई पत्राचार गरिएकाे छ । प्रतियोगिताको तयारी तीव्र बनाइएको अध्यक्ष पाठकले जानकारी दिए ।
प्रतियोगिताले प्रदेश र विभागका खेलाडीलाई समेत उत्साहित बनाउने अध्यक्ष पाठकको विश्वास छ ।
प्रतियोगिता पोखरा रंगशालास्थित बहुउद्देश्यीय कभर्ड हल र पोखरा ह्याण्डबल एकेडेमीमा लिगकम नक आउटका आधारमा सञ्चालन हुनेछ ।
प्रतियोगितामा विजेता टिमले एक लाख, उपविजेताले नगद ५० हजार र तेस्रो हुने टिमले नगद ३० हजार नगद पुरस्कारसहित ट्रफी, मेडल तथा प्रमाणपत्र प्राप्त गर्ने छन् ।
यस्तै उत्कृष्ट गोलरक्षक, उत्कृष्ट खेलाडी र सर्वाधिक गोलकर्तालाई पाँच/पाँच हजार नगद पुरस्कार, ट्रफी तथा प्रमाणपत्र प्रदान गरिने छ ।
प्रतियोगिता सम्पन्न गर्न करिब १४ लाख खर्च हुने संघको अनुमान छ । प्रतियोगितालाई कास्की जिल्ला ह्याण्डबल संघले प्राविधिक सहयोग गर्नेछ ।
