पोखरा । पोखरा महानगरपालिका वडा नं. २६ को सिलिङ्गेमा ४० फिट अग्लो शिवलिङ्गको निर्माण हुने भएको छ ।
एक करोड २० लाखको लागतमा निर्माण हुने योजनाका लागि चालु आवमा वडामार्फत महानगरले ५० लाख रुपैयाँ विनियोजन गरेको छ ।
शिवलिङ्गको सोमबार एक कार्यक्रमका बीच पोखरा-२६ का वडाध्यक्ष नरेन्द्र थापाले शिलान्यास गरे ।
कार्यक्रममा वडाध्यक्ष थापाले जटा शंकर धार्मिक विकास समितिमार्फत नौ करोड रुपैयाँको डीपीआर तयार गरी निर्माण कार्य अघि बढाइएको बताए ।
अध्यक्ष थापाले सबै काम सम्पन्न भएपश्चात् सिलिङ्गे धार्मिक पर्यटनको एक व्यवस्थित नयाँ गन्तव्य बन्ने दावी गरे ।
उनले केही समयदेखि कोटीहोम विवादले पोखराको धार्मिक वातावरण बिग्रिएको भन्दै संवादबाट सबै समस्या हल गर्न आग्रह गरे ।
उनले कोटीहोमका नाउँमा हिन्दू धर्मका अनुयायीलाई विभाजित बनाउने काम भइरहेको उल्लेख गर्दै होम, यज्ञ, यज्ञादीले सबैलाई समेट्नुपर्ने बताए ।
कार्यक्रममा सर्वोच्च अदालतका पूर्व न्यायाधीश डा. आनन्दमोहन भट्टराईले आफ्नो निवित्त जीवन समाजका लागि कहाँनेर प्रयोग हुन्छ त्यसका लागि प्रयोग गर्न सुझाव दिए ।
उनले स्थानीय सरकारले धार्मिक र सांस्कृतिक सम्पदाको संरक्षणमा ध्यान दिनु पर्नेमा जोड दिँदै डीपीआर अनुसारको कार्य अघि बढाउन सबैको सहयोग र साथको आवश्यकता पर्ने औँल्याए ।
शिक्षाविद् रविप्रसाद बरालले मन र मस्तिष्कको समिश्रण नै आध्यात्म भएकाले दुवैको सन्तुलनबाट धार्मिक कार्यलाई अघि बढाउन आग्रह गरे । उनले धार्मिक कार्य व्यापारका लागि गर्न नहुनेमा जोड दिए ।
जटाशंकर धार्मिक विकास समिति अध्यक्ष युवा पण्डित रामप्रसाद सिग्देलको अध्यक्षतामा भएको कार्यक्रममा स्थानीय समाजसेवी हरिप्रसाद अधिकारी, चन्द्रबहादुर रानाभाट, संस्थाका वरिष्ठ उपाध्यक्ष एवं पोखरा महानगरपालिका वडा नंं २६ का वडासदस्य तीर्थबहादुर राजभाट, संस्थाका उपाध्यक्ष एवं गुरूयोजना संयोजक विकास रानाभाट, संस्थाका सचिव विशाल रानाभाटलगायतले बोलेका थिए ।
