पोखरा । गण्डकी प्रदेशका प्रमुख डिल्लीराज भट्टले नेपालको शैक्षिक उन्नयनमा सेवा निवृत्त शिक्षकको अनुभव सदुपयोग गर्न जरूरी रहेको बताएका छन् ।
निवृत्त शिक्षक समुदाय कास्कीको २४औँ वार्षिक साधारणसभामा भट्टले शिक्षण पेशालाई अझ बढी सामाजिक हैसियत प्रदान गर्न आवश्यक रहेको बताए ।
‘निवृत्त शिक्षक समुदायले पेशागत अधिकारको मात्र नभएर शैक्षिक, सामाजिक क्षेत्रमा पनि उल्लेखनीय कार्य गर्दै आएको पाएको छु’, उनले भने, ‘हामीसँग विज्ञ शिक्षक छन्, राम्रा प्रशिक्षक छन्, सरकारका तीनै तहले सदुपयोग गरेर राष्ट्रहितमा शिक्षकका अनुभवलाई उपयोग गरी शैक्षिक गुणस्तर उन्नयनमा लगाउन आवश्यक छ ।’
देशको कर्णधार तयार गर्ने र मुलुकका महत्वपूर्ण परिवर्तनहरुमा अहम् भूमिका निर्वाह गर्ने शिक्षकले अवकाशपछि पनि सम्माननीय र सुरक्षित जीवनयापन गर्नसक्ने राम्रो वातावरण बनाउनुपर्ने उनले बताए । शिक्षकको सम्मान नहुने समाजलाई उत्कृष्ट र शिक्षित समाज भन्न नसकिने उनको भनाइ छ ।
उनले भने, ‘प्रत्येक मानिसले जीवनभर कुनै क्षेत्रको सेवा गरेपछि जीवनका उत्तरार्द्धमा आर्थिक तथा हरेक कोणबाट आफू सुरक्षित बन्ने अपेक्षा राखेका हुन्छन्, सेवा निवृत्त शिक्षकले आफ्नो परिचयपत्र बोकेर आफूले समाज र सिङ्गो देशलाई पुर्याएको योगदानप्रति गर्व गर्नसक्ने अवस्था निर्माण गर्नुपर्नेछ ।’
प्रदेश प्रमुख भट्टले निवृत्त शिक्षकले निजामति कर्मचारी सरह सेवासुविधा माग गर्दै आएकोबारे आफू जानकार रहेको बताए ।
शिक्षा ऐन संसद्को यही अधिवेशनबाट जारी गर्ने गरी संघ सरकारले काम अघि बढाइरहेको उल्लेख गरे ।
ऐनमा समेट्ने विषयमा एकमत बनाउन लागि निवृत्त शिक्षक समुदायको पनि प्रमुख भूमिका रहने उनको भनाइ छ ।
निवृत्त शिक्षक समुदायले स्थापनकालदेखि नै संस्थाले सुधार र शिक्षक हकहितका लागि भएका थुप्रै प्रयासमा सक्रिय भूमिका निर्वाह गरेको थाहा पाउँदा खुशी पनि व्यक्त गरे ।
